Nani: నాని 'దసరా' కోసం 12 కోట్లతో విలేజ్ సెట్!

నాని హీరోగా ఇటీవల వచ్చిన 'శ్యామ్ సింగ రాయ్' భారీ విజయాన్ని అందుకుంది. లుక్ పరంగా .. యాక్టింగ్ పరంగా కూడా ఈ సినిమా ఆయనకి ప్రశంసలను తెచ్చిపెట్టింది. ఆ తరువాత సినిమా అయిన 'అంటే .. సుందరానికీ' కూడా షూటింగును పూర్తి చేసుకుంది. వివేక్ ఆత్రేయ రూపొందించిన ఈ సినిమాతో కథానాయికగా తెలుగు తెరకి నజ్రియా నజీమ్ పరిచయమవుతోంది.

ఆ తరువాత ప్రాజెక్టుగా 'దసరా' సెట్స్ పై ఉంది. చెరుకూరి సుధాకర్ నిర్మిస్తున్న ఈ సినిమాతో, శ్రీకాంత్ ఓదెల దర్శకుడిగా పరిచయమవుతున్నాడు. ఈ సినిమాలో నాని డిఫరెంట్ లుక్ తో కనిపించనున్నాడు. ఆయన ఈ సినిమాలో తెలంగాణ యాసలో మాట్లాడనున్నాడు. అందుకోసం ఆయన ఒక ట్యూటర్ ను కూడా పెట్టుకున్నాడని అంటున్నారు.

ఈ సినిమా కోసం హైదరాబాద్ శివారులో 12 ఎకరాల్లో ఒక విలేజ్ సెట్ ను నిర్మిస్తున్నారని అంటున్నారు. 12 కోట్ల రూపాయల ఖర్చుతో ఈ సెట్ నిర్మాణం నడుస్తోందని చెబుతున్నారు. ఈ సెట్లోనే ఎక్కువ భాగం షూటింగు జరుగుతుందట. ఈ సెట్ కోసం 'కడియం' నుంచి పెద్ద ఎత్తున వివిధ రకాల మొక్కలను తెప్పిస్తున్నారని అంటున్నారు. 'నేను లోకల్' తరువాత నానితో కలిసి కీర్తి సురేశ్ చేస్తున్న సినిమా ఇది.