ott: నాని సినిమా ఓటీటీలో విడుద‌ల‌వుతుందంటూ ప్ర‌చారం.. నిర్మాణ సంస్థ క్లారిటీ!

నేచుర‌ల్ స్టార్ నాని హీరోగా సాయి పల్లవి, కృతిశెట్టి హీరోయిన్లుగా రాహుల్‌ సాంకృత్యన్‌ దర్శకత్వంలో ‘శ్యామ్‌ సింగరాయ్‌’ సినిమా రూపొందుతోంది. ఈ సినిమా డిజిటల్‌, శాటిలైట్‌ రైట్స్‌కు భారీ డిమాండ్ ఉంద‌ని, ఓటీటీలో విడుద‌ల చేసేందుకు ఆయా సంస్థ‌లు భారీగా ఆఫర్‌ చేసినట్లు ప‌లు వెబ్‌సైట్లలో ప్ర‌చారం జ‌రుగుతోంది. అంతేగాక‌, ఓ ఓటీటీ ఫ్లాట్‌ఫామ్‌ రూ.40 కోట్లు చెల్లించి విడుదల హక్కులు కొనుగోలు చేసిందని కూడా వార్తలు వ‌స్తుండ‌డంతో దీనిపై ఈ సినిమా నిర్మాతలు స్పందించారు.
 
ఈ వార్త‌ల‌న్నీ అవాస్తవాలేనని నిర్మాత‌లు స్ప‌ష్ట‌త నిచ్చారు. ‘శ్యామ్‌ సింగరాయ్‌’ విడుదల విషయంలో తాము ఇప్ప‌టివ‌ర‌కు ఎటువంటి నిర్ణయమూ తీసుకోలేదని వారు చెప్పారు. కాగా, ఈ సినిమాలో నాని రింగుల జుట్టు, కోర మీసాలలతో విభిన్నమైన లుక్‌లో కన‌ప‌డుతుండ‌డం ప్రేక్ష‌కుల‌ను బాగా ఆక‌ర్షిస్తోంది. నిహారిక ఎంటర్‌టైన్‌మెంట్స్‌ పతాకంపై వెంకట్‌ బోయినపల్లి ఈ సినిమాను రూపొందిస్తున్నారు.