Balakrishna: 'డిక్టేటర్' దర్శకుడితో బాలయ్య సినిమా ఖరారే!

బాలకృష్ణ ఎప్పుడూ కూడా సినిమాల విషయంలో గ్యాప్ రానీయరు. తన సినిమాల జయాపజయాలు ఎలా ఉన్నా తదుపరి సినిమాను సాధ్యమైనంత త్వరగా పట్టాలెక్కిస్తూనే ఉంటారు. ఆయన తాజా చిత్రంగా 'అఖండ' రూపొందుతోంది. ఈ దసరాకు ఈ సినిమాను విడుదల చేసే ఆలోచనలో ఉన్నారు. ఆ తరువాత సినిమాను ఆయన గోపీచంద్ మలినేని దర్శకత్వంలో చేయనున్నారు. 'క్రాక్' సినిమాతో గోపీచంద్ మలినేని భారీ హిట్ ఇచ్చి ఉండటం వలన, ఈ ప్రాజెక్టుపై సహజంగానే భారీ అంచనాలు ఉన్నాయి. త్వరలోనే ఈ సినిమా రెగ్యులర్ షూటింగు మొదలుకానుంది.

ఈ నేపథ్యంలో శ్రీవాస్ దర్శకత్వంలో బాలయ్య మరో సినిమా చేయనున్నారనే టాక్ బలంగా వినిపిస్తోంది. 'లక్ష్యం' .. 'లౌక్యం' వంటి సూపర్ హిట్లు ఇచ్చిన శ్రీవాస్, ఆ మధ్య బాలయ్యతో 'డిక్టేటర్' చేశాడు. ఆ సినిమా ఫరవాలేదనిపించుకుంది. మళ్లీ ఇప్పుడు ఈ కాంబినేషన్ ఓకే అయిందని అంటున్నారు. యాక్షన్ .. ఎమోషన్ తో కూడిన ఈ సినిమాను, సీకే ఎంటర్టైన్మెంట్ బ్యానర్ పై సి.కల్యాణ్ నిర్మించనున్నారని చెబుతున్నారు. ఇక శ్రీవాస్ సినిమా తరువాత అనిల్ రావిపూడి .. వినాయక్ దర్శకత్వంలో బాలకృష్ణ సినిమాలు ఉండనున్నట్టు తెలుస్తోంది.