విమానం దూసుకెళుతుండగా డోర్ తీసేందుకు యత్నించిన ప్రయాణికుడు

ఢిల్లీ నుంచి వారణాసి వెళుతున్న స్పైస్ జెట్ విమానంలో అనూహ్య సంఘటన చోటుచేసుకుంది. విమానం గాల్లో ప్రయాణిస్తుండగా ఓ వ్యక్తి హఠాత్తుగా లేచి అత్యవసర ద్వారం తెరిచే ప్రయత్నం చేశాడు. దాంతో విమానంలో తీవ్ర కలకలం రేగింది. ప్రయాణికులు ఆందోళనకు గురయ్యారు. వెంటనే స్పందించిన సిబ్బంది, ఇతర ప్రయాణికుల సాయంతో ఆ వ్యక్తిని నిలువరించారు. దాంతో పెద్ద ప్రమాదం తప్పింది.

కాగా విమానం వారణాసిలో ల్యాండయిన తర్వాత ఆ ప్రయాణికుడిని సీఐఎస్ఎఫ్ బలగాలకు అప్పగించారు. ఈ ఘటన జరిగిన సమయంలో స్పైస్ జెట్ విమానంలో 83 మంది ప్రయాణికులు ఉన్నారు. ఈ ఉదంతంపై ఫూల్ పూర్ పోలీస్ స్టేషన్ లో కేసు నమోదైంది. ఆ వ్యక్తి మానసిక పరిస్థితి సరిగా లేదని పోలీసులు భావిస్తున్నారు.