ఎందుకొచ్చిన గొడవని... వివాదాస్పద యాడ్ ను తొలగించిన తనిష్క్!

13-10-2020 Tue 15:34
Tanishq new ad raises fury in social media
  • తనిష్క్ పై నెటిజన్ల ఆగ్రహం
  • లవ్ జిహాద్ ను ప్రోత్సహించేలా యాడ్ ఉందంటున్న నెటిజన్లు
  • బాయ్ కాట్ తనిష్క్ అంటూ ప్రచారం

తనిష్క్... దేశంలోని ప్రముఖ ఆభరణాల సంస్థల్లో ఒకటి. ఇటీవల తనిష్క్ 'ఏకత్వం' పేరిట కొత్త నగల కలెక్షన్ తీసుకువచ్చింది. అయితే, ఈ 'ఏకత్వం' కలెక్షన్ ను ప్రచారం చేసేందుకు రూపొందించిన వాణిజ్య ప్రకటన వివాదాస్పమైంది. ఇది లవ్ జిహాద్ ను ప్రోత్సహించేలా ఉందంటూ సోషల్ మీడియాలో దుమారం రేగింది. దాంతో వెనక్కి తగ్గిన తనిష్క్ తన యాడ్ ను సామాజిక మాధ్యమాల నుంచి తొలగించింది.

ఇంతకీ ఆ యాడ్ లో ఏముందంటే... ఓ ముస్లిం కుటుంబం తమ ఇంటికి ఓ హిందూ యువతిని కోడలిగా ఆహ్వానిస్తుంది. ఆ హిందూ యువతికి హిందూ సంప్రదాయం ప్రకారమే సీమంతం నిర్వహిస్తారు. ఈ యాడ్ వీడియోలో కొన్ని వ్యాఖ్యలు కూడా ఉంటాయి. "తమ కన్నబిడ్డలా ఆదరించే ఇంటికి ఆమె కోడలిగా వెళ్లింది. ఆమె కోసం ఆ కుటుంబానికి చెందినవారు తమ సంప్రదాయాన్ని పక్కనబెట్టి వేడుక చేశారు. మామూలుగా అయితే ఇలా చేయరు. ఇది రెండు భిన్నమైన మతాలు, సంప్రదాయాలు, సంస్కృతుల అందమైన కలయిక" అంటూ తనిష్క్ అభివర్ణించింది.

ఈ తరహా అభివర్ణన నెటిజన్లకు ఆగ్రహం తెప్పించింది. ఈ యాడ్ తో లవ్ జిహాద్ కు తనిష్క్ మద్దతు పలుకుతున్నట్టుగా ఉందని, ఈ ప్రకటనను నిషేధించాలని సోషల్ మీడియాలో ఆగ్రహం వ్యక్తం చేశారు. బాయ్ కాట్ తనిష్క్ అనే హ్యాష్ ట్యాగ్ తో హోరెత్తించారు. నిన్న, ఇవాళ ఇదే ట్రెండింగ్ లో ఉండడంతో తనిష్క్ తన యాడ్ వీడియోను తొలగించింది.