సిద్ధు, శ్రద్ధ జంటగా 'నరుడి బ్రతుకు నటన'

అటు స్టార్స్ తో భారీ చిత్రాలను.. ఇటు చిన్న తారలతో బడ్జెట్ చిత్రాలనూ నిర్మిస్తూ ముందుకు సాగుతున్న సితార ఎంటర్ టైన్మెంట్స్ సంస్థ తన తాజా చిత్రాన్ని ఈ రోజు ప్రకటించింది. ఈ సినిమా పేరు 'నరుడి బ్రతుకు నటన'. ఈమధ్య వచ్చిన 'కృష్ణ అండ్ హిజ్ లీల' చిత్రంలో జంటగా నటించిన సిద్ధు జొన్నలగడ్డ, శ్రద్ధ శ్రీనాథ్ ఇందులో హీరో హీరోయిన్లుగా నటిస్తారు. ఈ చిత్రం ద్వారా విమల్ కృష్ణ అనే కుర్రాడు దర్శకుడిగా పరిచయం అవుతున్నాడు.

ఇక ఈ చిత్రానికి సంబంధించిన టైటిల్ లోగోతో కూడిన ప్రచార చిత్రాన్ని ఈ రోజు సంస్థ విడుదల చేసింది. తన్మయత్వంలో వున్న  ఓ ప్రేమజంట చెవులకు హెడ్ ఫోన్స్ తో ఈ ప్రచార చిత్రాన్ని కొత్తగా డిజైన్ చేశారు. దీనిని బట్టి సంగీతానికి కూడా ఈ చిత్రంలో ప్రాధాన్యత ఉన్నట్టు తెలుస్తోంది. దీపావళి నుంచి ఈ చిత్రం షూటింగును నిర్వహిస్తారు. సితార ఎంటర్ టైన్ మెంట్స్ అధినేత సూర్యదేవర నాగ వంశీ నిర్మిస్తున్న పదవ చిత్రం ఇది.