ప్రభాస్ 'ఆదిపురుష్' గురించి మరికొన్ని వివరాలు ఇవిగో!

టాలీవుడ్ అగ్రహీరో ప్రభాస్ కొత్త చిత్రం 'ఆదిపురుష్' సెట్స్ పైకి వెళ్లకముందే సంచలనం సృష్టిస్తోంది. దేశవ్యాప్తంగా ఈ సినిమా చర్చనీయాంశంగా మారింది. సినిమా టైటిల్ పోస్టర్ తోనే విపరీతమైన ఆసక్తి కలుగుతోంది. ఓమ్ రౌత్ దర్శకత్వంలో వస్తున్న ఈ చిత్రం ద్వారా ప్రభాస్ బాలీవుడ్ ఎంట్రీ ఇస్తున్నారు. ఇది అత్యంత భారీ బడ్జెట్ చిత్రమన్న ప్రచారం జరుగుతోంది. ఈ సినిమా అనేక విశేషాలను కలిగివుంది.

ఇది ప్రధానంగా 3డీ ఫార్మాట్ లో తెరకెక్కనుంది. ఆదిపురుష్ ను 5 భారతీయ భాషల్లో రూపొందిస్తున్నారు. హిందీ, తెలుగు, తమిళం, కన్నడ, మలయాళం భాషల్లోనే కాకుండా పలు విదేశీ భాషల్లోనూ ఆదిపురుష్ విడుదలవుతుంది. ప్రభాస్ ఈ చిత్రం ద్వారా బాహుబలి వంటి ధీరోదాత్తమైన పాత్రలో మరోసారి కనువిందు చేయనున్నారు.

ఓ పాప్యులర్ బాలీవుడ్ స్టార్ ఇందులో విలన్ పాత్రలో కనిపించనున్నాడు. షూటింగ్ 2021లో మొదలవుతుంది. టి సిరీస్, రెట్రో ఫిలింస్ సంయుక్తంగా నిర్మిస్తున్న ఈ చిత్రం 2022లో వరల్డ్ వైడ్ గా రిలీజ్ కానుంది. రామాయణంలోని ఓ ఘట్టం ఆధారంగా 'ఆదిపురుష్'ను తెరకెక్కిస్తున్నట్టు ప్రచారం జరుగుతోంది. హైందవంలో రాముడ్ని ఆదిపురుషుడిగా భావించడం ఈ ప్రచారానికి బలం చేకూరుస్తోంది.