Balakrishna: అదంతా పుకారేనంటున్న యంగ్ హీరో

నవీన్ పోలిశెట్టి పేరు వినగానే అందరికీ 'ఏజెంట్ సాయిశ్రీనివాస ఆత్రేయ' పేరు గుర్తుకు వస్తుంది. ఆ సినిమాలో ఆయన చేసిన సందడి అంతా ఇంతా కాదు. కథల ఎంపికలో చాలా జాగ్రత్తలు తీసుకునే నవీన్, తాజాగా 'జాతిరత్నాలు' అనే సినిమా చేశాడు. లాక్ డౌన్ తరువాత ఈ సినిమా థియేటర్స్ కి రానుంది.

పూర్తి వినోదభరితమైన ఈ సినిమా కోసం ఆయన అభిమానులు ఎదురుచూస్తున్నారు. ఈ నేపథ్యంలో బాలకృష్ణ - బోయపాటి సినిమాలో ఆయన ఒక ముఖ్యమైన పాత్రను చేయనున్నట్టుగా రెండు మూడు రోజులుగా వార్తలు వస్తున్నాయి. ఈ విషయంపై ఆయన స్పందిస్తూ .. "బోయపాటి సినిమాకి సంబంధించి ఇంతవరకూ నన్ను ఎవరూ సంప్రదించలేదు. ఈ సినిమాలో నేను చేయనున్నట్టు వస్తున్న వార్తల్లో ఎంతమాత్రం నిజం లేదు. అదంతా కేవలం పుకారు మాత్రమే" అంటూ జోరుగా జరుగుతున్న ప్రచారానికి ఆయన తెరదించేశాడు.