టీడీపీ ఎమ్మెల్యే వెలగపూడి ఇంటి ముట్టడికి వైసీపీ నేతల యత్నం.. ఉద్రిక్తత!

విశాఖపట్టణం ఎంవీపీ కాలనీలోని టీడీపీ ఎమ్మెల్యే వెలగపూడి రామకృష్ణబాబు ఇంటి వద్ద నిన్న సాయంత్రం ఉద్రిక్త పరిస్థితి నెలకొంది. రాజధాని అంశంపై చర్చ సందర్భంగా ఎమ్మెల్యే వెలగపూడి పోడియం వద్దకు వెళ్లి నిరసన తెలిపారు. దీనిని నిరసించిన విశాఖ వైసీపీ కార్యకర్తలు ఆయన ఇంటి ముట్టడికి పిలుపునిచ్చారు. అక్కరమాని విజయనిర్మల నేతృత్వంలో కార్యకర్తలు తొలుత ఎంవీపీ కాలనీలోని టీటీడీ కల్యాణ మండపానికి చేరుకున్నారు. అక్కడి నుంచి ర్యాలీగా వెలగపూడి ఇంటికి బయలుదేరారు.

సమాచారం అందుకున్న పోలీసులు ఎమ్మెల్యే నివాసానికి వెళ్లే దారిని తాళ్లతో మూసివేశారు. దీంతో డబుల్ రోడ్డు మీదుగా వెలగపూడి ఇంటికి వెళ్లేందుకు కార్యకర్తలు ప్రయత్నించారు. అప్పటికే అక్కడికి భారీగా చేరుకున్న పోలీసులు వారి ప్రయత్నాలను అడ్డుకున్నారు. మరోవైపు, విషయం తెలిసిన టీడీపీ నేతలు, కార్యకర్తలు వెలగపూడి నివాసానికి చేరుకుని వైసీపీ కార్యకర్తలను అడ్డుకునేందుకు ప్రయత్నించారు. దీంతో కాసేపు ఉద్రిక్త వాతావరణం నెలకొంది. తాళ్లపై నుంచి దూకేందుకు ప్రయత్నించిన వైసీపీ కార్యకర్తలను పోలీసులు అడ్డుకున్నారు. దీంతో వారు రోడ్డుపై బైఠాయించి ఎమ్మెల్యేకు వ్యతిరేకంగా నినాదాలు చేశారు. ఆయన దిష్టిబొమ్మను దహనం చేశారు.