కెనడా గ్లోబల్ టి20 లీగ్ లో యువరాజ్ మెరుపులు

ఇటీవలే అంతర్జాతీయ క్రికెట్ కు గుడ్ బై చెప్పిన యువరాజ్ సింగ్ కెనడాలో జరుగుతున్న గ్లోబల్ టీ20 లీగ్ లో అదరగొడుతున్నాడు. ఈ లీగ్ లో టొరంటో నేషనల్స్ కు ప్రాతినిధ్యం వహిస్తున్న యువీ ఎడ్మంటన్ రాయల్స్ తో మ్యాచ్ లో 21 బంతుల్లో 35 పరుగులు చేశాడు. ఈ లెఫ్ట్ హ్యాండర్ స్కోరులో 3 ఫోర్లు, 3 సిక్స్ లతో పాత యువీని గుర్తుచేశాడు. ఈ మ్యాచ్ లో మొదట బ్యాటింగ్ చేసిన ఎడ్మంటన్ రాయల్స్ 6 వికెట్లకు 191 పరుగులు చేయగా, లక్ష్యఛేదనలో టొరంటో నేషనల్స్ 17.5 ఓవర్లలోనే పని పూర్తిచేసింది. యువీ వేగంగా ఆడడంతో టొరంటో జట్టు 13 బంతులు మిగిలుండగానే జయభేరి మోగించింది.