వీధి రౌడీలా మారిన బీజేపీ ఎమ్మెల్యే.. ఆక్రమణలు తొలగిస్తున్న ప్రభుత్వ ఉద్యోగులపై బ్యాటుతో దాడి!

అధికార పార్టీ నేతలు అంటే ప్రభుత్వం సాఫీగా సాగేలా పనిచేయాలి. ప్రజలకు-అధికారులకు మధ్య ఏవైనా గొడవ వస్తే ఓ పెద్దమనిషిలా ప్రవర్తించి సమస్యను పరిష్కరించాలి. కానీ మధ్యప్రదేశ్ బీజేపీ ఎమ్మెల్యే అకాశ్ విజయవర్గీయ అచ్చం ఓ వీధి రౌడీలా మారిపోయారు. ఇండోర్ మున్సిపల్ కార్పొరేషన్ లో ఈరోజు అక్రమ కట్టడాలు తొలగించేందుకు వచ్చిన అధికారులపై క్రికెట్ బ్యాట్ తో దాడి చేశారు. తన అనుచరులతో కలిసి ప్రభుత్వ అధికారులను తరిమితరిమి కొట్టారు. చివరికి ఓ ఉద్యోగిని పట్టుకుని టీ షర్ట్ కూడా చించేశారు.

అన్నట్లు ఈ అకాశ్ విజయవర్గీయ బీజేపీ సీనియర్ నేత కైలాశ్ విజయవర్గీయ సుపుత్రుడు కావడం గమనార్హం. కాగా, ఈ దారుణ ఘటనను మౌన ప్రేక్షకులుగా చూసిన పోలీసులు.. చివరికి ప్రభుత్వ ఉద్యోగులను బీజేపీ శ్రేణుల చెర నుంచి కాపాడి సురక్షిత ప్రాంతానికి తరలించారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ గా మారింది. కాగా, కావాలంటే మరోసారి కూడా ప్రభుత్వ ఉద్యోగులను కొడతానని అకాశ్ విజయవర్గీయ సెలవివ్వడం గమనార్హం.