'మజ్ను' దర్శకుడితో నందమూరి హీరో

కల్యాణ్ రామ్ ను సక్సెస్ పలకరించి చాలా కాలమే అయింది. సక్సెస్ కోసం ఎదురుచూస్తూ ఆయన కొత్త చిత్రాలను చేస్తూ వెళుతున్నాడు. ఈ సారి మరింత కొత్త కంటెంట్ ను ఎంచుకుని, గుహన్ దర్శకత్వంలో '118' సినిమా చేస్తున్నాడు. మార్చి 1వ తేదీన ఈ సినిమా ప్రేక్షకుల ముందుకు రానుంది.

ఈ సినిమా విడుదలకి ముస్తాబవుతూ ఉండగానే, మరో దర్శకుడికి కల్యాణ్ రామ్ గ్రీన్ సిగ్నల్ ఇచ్చేశాడు .. ఆ దర్శకుడి పేరే విరించి వర్మ. ప్రేమకథలను తెరకెక్కించడంలో విరించి వర్మకి మంచి పట్టుంది. 'ఉయ్యాలా .. జంపాలా' .. 'మజ్ను' సినిమాలు ఆ విషయాన్ని నిరూపిస్తాయి. అలాంటి విరించి వర్మ .. కల్యాణ్ రామ్ కథానాయకుడిగా ఈ సారి ఫ్యామిలీ ఎంటర్టైనర్ ను తెరపైకి తీసుకురావడానికి సన్నాహాలు చేసుకుంటున్నాడు. సితార ఎంటర్టైన్మెంట్స్ వారు నిర్మిస్తోన్న ఈ సినిమాను వేసవిలో సెట్స్ పైకి తీసుకెళ్లనున్నారు.