సాంకేతికత ఆటను మెరుగుపరచాలి కానీ ఆటంకం కాకూడదు: యువ క్రికెటర్లకు సచిన్ హితవు

ముంబై వేదికగా జరిగిన ఇండియన్ స్ట్రీట్ ప్రీమియర్ లీగ్ (ISPL) సీజన్ 4 ఆటగాళ్ల వేలంలో భారత క్రికెట్ దిగ్గజం సచిన్ టెండూల్కర్ పాల్గొన్నాడు. ఈ సందర్భంగా భవిష్యత్ తరం క్రికెటర్లకు పలు కీలక సూచనలు చేశాడు. ఆధునిక క్రికెట్‌లో టెక్నాలజీ పాత్ర పెరుగుతున్న నేపథ్యంలో, దాన్ని ఏ విధంగా ఉపయోగించుకోవాలో వివరిస్తూనే, ఆటపై సహజమైన ప్రేమను కోల్పోకూడదని పిలుపునిచ్చాడు. యువ ఆటగాళ్లు ఒత్తిడిని అధిగమించి ఎలా రాణించవచ్చో సచిన్ సవివరంగా పంచుకున్నాడు.

టెక్నాలజీ అనేది ఆటను మరింత మెరుగుపరుచుకోవడానికి మాత్రమే ఉపయోగపడాలని, అది ఆటపై పెత్తనం చేయకూడదని సచిన్ స్పష్టం చేశాడు. సాధన చేసే సమయంలో, మ్యాచ్ ప్రణాళికలు రూపొందించేటప్పుడు డేటా, వీడియో విశ్లేషణ వంటి టెక్నాలజీని వాడుకోవచ్చని తెలిపారు. అయితే మైదానంలోకి దిగిన తర్వాత బౌలర్‌ను ఎదుర్కొనే సమయంలో అధికంగా ఆలోచించడం మానేసి, సహజమైన అంతర్ దృష్టిపైనే ఆధారపడాలని సూచించాడు. టెక్నాలజీ ఆలోచనల్లో పడి ఆటపై దృష్టి మరల్చుకోవద్దని స్పష్టం చేశాడు.

అలాగే క్రికెట్ ఆడేటప్పుడు దక్కే ఆనందాన్ని ఎప్పటికీ దూరం చేసుకోవద్దని సచిన్ అన్నాడు. అంచనాలు, బాధ్యతలు, ఒత్తిళ్ల కారణంగా ఆటపై ఉన్న మక్కువ సన్నగిల్లకుండా చూసుకోవాలని హితవు పలికాడు. ఈ సందర్భంగా తన వ్యక్తిగత అనుభవాన్ని గుర్తు చేసుకుంటూ.. గతంలో ఇంగ్లండ్‌లో గాయం కారణంగా ఆటకు దూరమైన సమయంలో, శిక్షణ మరియు వృత్తిపరమైన బాధ్యతల మధ్య అసలైన ఆట ఆనందాన్ని దాదాపు మరచిపోయిన విషయాన్ని తాను గుర్తించానని పేర్కొన్నాడు. అందుకే ఆటగాళ్లు తమ ప్రాథమిక ఉత్సాహాన్ని ఎప్పుడూ కాపాడుకోవాలని చెప్పాడు.

మరోవైపు గ్రామీణ, చిన్న పట్టణాల్లోని ప్రతిభావంతులను గుర్తించడంలో ఇండియన్ స్ట్రీట్ ప్రీమియర్ లీగ్ కీలక పాత్ర పోషిస్తోందని సచిన్ కొనియాడాడు. పారదర్శకమైన ఎంపిక విధానం, అత్యుత్తమ ప్రదర్శన ఆధారంగానే ఇక్కడ అవకాశాలు లభిస్తున్నాయని ప్రశంసించాడు. ఐఎస్పీఎల్ సీజన్ 3లో అద్భుతంగా రాణించి, సయ్యద్ ముస్తాక్ అలీ ట్రోఫీ కోసం మహారాష్ట్ర జట్టుకు ఎంపికైన వివేక్ షెలార్‌ను ఈ సందర్భంగా ఉదాహరణగా ప్రస్తావించాడు.

టెక్నాలజీతో సరైన సన్నద్ధత, మైదానంలో సహజ నైపుణ్యంతో కూడిన ఆట, ఆత్మవిశ్వాసం, ఆట పట్ల అంకితభావం ఉన్నప్పుడే క్రీడాకారులు గొప్ప శిఖరాలను అధిరోహించగలరని మాస్టర్ బ్లాస్టర్ యువ క్రీడాకారులకు దిశానిర్దేశం చేశాడు.