ఎవరూ కావాలని వికెట్ పారేసుకోలేదు: నాలుగో వన్డేలో ఘోరపరాజయంపై శ్రేయస్ కామెంట్స్

కొత్త బంతితో న్యూజిలాండ్ పేసర్ మ్యాట్ హెన్రీ కనబరిచిన అద్భుతమైన లైన్ అండ్ లెంగ్తే మ్యాచ్ ఫలితాన్ని శాసించిందని భారత తాత్కాలిక కెప్టెన్ శ్రేయస్ అయ్యర్ స్పష్టం చేశాడు. బే ఓవల్ వేదికగా జరిగిన నాలుగో వన్డేలో భారత జట్టు 89 పరుగులకే కుప్పకూలి, 244 పరుగుల భారీ తేడాతో పరాజయం పాలైన అనంతరం అయ్యర్ మాట్లాడారు. ప్రత్యర్థి బౌలర్ హెన్రీ అసాధారణ ప్రదర్శనను ప్రశంసించడంతో పాటు మ్యాచ్‌లో చోటుచేసుకున్న పరిణామాలను విశ్లేషించాడు.

మ్యాచ్ అనంతరం జరిగిన ప్రెజెంటేషన్ కార్యక్రమంలో శ్రేయస్ అయ్యర్ మాట్లాడుతూ.. పిచ్ ప్రవర్తించిన తీరుపై కీలక వ్యాఖ్యలు చేశాడు. "మొదటి ఇన్నింగ్స్‌కు, రెండో ఇన్నింగ్స్‌కు మధ్య పిచ్ పరిస్థితుల్లో చాలా పెద్ద తేడా కనిపించింది. అయితే ఎవరికి దక్కాల్సిన గుర్తింపు వారికి కచ్చితంగా ఇవ్వాలి. హెన్రీ తొలి బంతి నుంచే సరైన ప్రదేశాల్లో బంతులు విసిరిన తీరు నిజంగా అద్భుతం. మొదటి ఇన్నింగ్స్‌లో కివీస్ బ్యాటర్లు బంతి పైకి లేస్తున్న సమయంలో కూడా చక్కగా షాట్లు ఆడారు. ఆ తర్వాత వారు 330కి పైగా పరుగులు చేయడంతో ఇది బ్యాటింగ్‌కు అనుకూలమైన వికెట్ అని మేము భావించాం. ఫీల్డింగ్‌లో ఒకట్రెండు క్యాచ్‌లు చేజారినప్పటికీ, ఆటలో అవి సహజమే" అని అయ్యర్ పేర్కొన్నాడు.

లక్ష్య ఛేదనలో ఎదురైన ఇబ్బందుల గురించి చెబుతూ.. "తొలి ఇన్నింగ్స్ చూసిన తర్వాత డ్రెస్సింగ్ రూమ్‌లో మేమంతా పూర్తి ఆత్మవిశ్వాసంతో ఉన్నాం. ఈ లక్ష్యాన్ని సులువుగానే ఛేదించగలమని అనుకున్నాం. కానీ రెండో ఇన్నింగ్స్‌లో బంతి ఊహించని రీతిలో లోపలికి, బయటకు సీమ్ అయింది. అలాంటి పరిస్థితుల్లో క్రీజులో ఎలా ఆడాలో బ్యాటర్లకు అర్థం కాలేదు. మా బ్యాటర్లు ఎవరూ కావాలని వికెట్ పారేసుకోలేదు. కివీస్ పేసర్లు విసిరిన అత్యుత్తమ డెలివరీలకే వికెట్లు పడ్డాయి" అని శ్రేయస్ అయ్యర్ వివరించారు.

ఈ మ్యాచ్‌లో కివీస్ పేసర్ మ్యాట్ హెన్రీ ఆరంభంలోనే టీమిండియాను కోలుకోలేని దెబ్బతీశాడు. భారత్ ఇంకా ఖాతా తెరవకముందే.. తొలి ఓవర్లోనే రోహిత్ శర్మ, విరాట్ కోహ్లీలను పెవిలియన్ పంపాడు. ఆ ఓవర్ చివరి బంతికి శ్రేయస్ అయ్యర్‌ను ఎల్బీడబ్ల్యూగా అవుట్ చేసి టీమిండియా నడ్డి విరిచాడు. అనంతరం నిప్పులు చెరిగిన హెన్రీ 6 వికెట్లు తీసి కేవలం 27 పరుగులు మాత్రమే ఇచ్చి తన కెరీర్ అత్యుత్తమ గణాంకాలను నమోదు చేశాడు.

ఈ పరాజయం భారత్‌ను పలు ప్రతికూల రికార్డుల్లో నిలిపింది. 2023 వన్డే ప్రపంచకప్ తర్వాత పవర్‌ప్లేలో భారత్ నమోదు చేసిన అత్యల్ప స్కోరు (26/4) ఇదే కావడం గమనార్హం. అంతేకాకుండా పరుగుల పరంగా వన్డే క్రికెట్ చరిత్రలో భారత్‌కు ఇది రెండో అతిపెద్ద పరాజయంగా నమోదైంది. ఈ ఓటమితో ఐదు మ్యాచ్‌ల సిరీస్‌లో భారత్ ఆధిక్యం 2-1కి తగ్గింది.

అయితే ఈ పరాజయాన్ని వీలైనంత త్వరగా మర్చిపోవాల్సిన అవసరం ఉందని శ్రేయస్ అయ్యర్ అన్నాడు. "ఈ మ్యాచ్‌లో బ్యాటింగ్, బౌలింగ్ విభాగాల్లో ఎక్కడ లోపాలు జరిగాయో విశ్లేషించుకుని, ఈ ఫలితాన్ని పక్కన పెట్టడం చాలా ముఖ్యం. సిరీస్‌లో ఇప్పటికే మేము రెండు మ్యాచ్‌లు గెలిచామన్న విషయాన్ని దృష్టిలో ఉంచుకోవాలి. దాని నుంచి సానుకూల అంశాలను తీసుకుని, సిరీస్ నిర్ణయాత్మక మ్యాచ్‌కు సరికొత్త ఉత్సాహంతో బరిలోకి దిగుతాం" అని స్పష్టం చేశాడు. సిరీస్ విజేతను తేల్చే ఐదో వన్డే ఆదివారం ఇదే బే ఓవల్ మైదానంలో జరగనుంది.