బొత్స సత్యనారాయణకు బిగ్ షాక్.. ఓటమి బాటలో కుమార్తె

ఆంధ్రప్రదేశ్‌లో ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రక్రియ ప్రశాంతంగా కొనసాగుతోంది. వెలువడుతున్న ట్రెండ్స్ ప్రకారం, ఈ ఎన్నికల్లో అధికార కూటమి ప్రభంజనం సృష్టిస్తుండగా, ప్రతిపక్ష వైసీపీ భారీ పరాజయం దిశగా పయనిస్తోంది. వైసీపీ అధినేత జగన్ సొంత నియోజకవర్గంలోని పులివెందుల జడ్పీటీసీ స్థానాన్ని కూడా ఆ పార్టీ కోల్పోవడం గమనార్హం. ఈ ఫలితాలతో వైసీపీ శ్రేణులు తీవ్ర నిరాశలో మునిగిపోయాయి.

మరోవైపు, ఈ ఎన్నికల ఫలితాలు వైసీపీ సీనియర్ నేత బొత్స సత్యనారాయణకు మిశ్రమ అనుభవాన్ని మిగిల్చాయి. విజయనగరం జిల్లా బొండపల్లి జడ్పీటీసీ స్థానం నుంచి పోటీ చేసిన ఆయన కుమార్తె అనూష ఓటమి బాటలో ఉన్నారు. ఇక్కడ కూటమి అభ్యర్థి నీరజ ఆధిక్యంలో కొనసాగుతున్నారు. దీంతో బొత్స సత్యనారాయణకు ఊహించని షాక్ తగిలినట్లయింది.

అయితే, ఇదే జిల్లాలోని గరివిడి జడ్పీటీసీ స్థానంలో బొత్స కోడలు, బొత్స పూజిత ముందంజలో ఉన్నారు. ఆమెపై పోటీ చేసిన టీడీపీ నేత కిమిడి కళా వెంకట్రావు కోడలైన కిమిడి సంధ్య వెనుకంజలో ఉన్నారు. దీంతో ఒకే కుటుంబంలో ఒకరు ఓటమి దిశగా, మరొకరు గెలుపు దిశగా ఉండటం రాజకీయ వర్గాల్లో చర్చనీయాంశంగా మారింది.