నా వెనుక ఏ రాజకీయ పార్టీ లేదు.. దేవుడు, అభిమానులే నా బలం: ధనుష్

ప్రముఖ నటుడు ధనుష్ తన రాజకీయ ప్రవేశంపై వస్తున్న ఊహాగానాలకు ఫుల్ క్లారిటీ ఇచ్చారు. తన వెనుక ఏ రాజకీయ పార్టీ లేదని, దేవుడు, తన అభిమానులు, ప్రజలు మాత్రమే తనకు అండగా ఉన్నారని ఆయన స్పష్టం చేశారు. చెన్నైలో జరిగిన తన తాజా చిత్రం ‘ఓమ్’ ఆడియో విడుదల కార్యక్రమంలో ఆయన ఈ కీలక వ్యాఖ్యలు చేశారు.

గత కొంతకాలంగా ధనుష్ రాజకీయాల్లోకి రాబోతున్నారని, ముఖ్యంగా బీజేపీ ఆయనకు మద్దతు ఇస్తోందని ప్రచారం జరుగుతోంది. తన అభిమాన సంఘాలను సంక్షేమ సంస్థలుగా మార్చడం, భారీగా సభ్యులను చేర్పించడం వంటి పరిణామాలతో ఈ ఊహాగానాలు మరింత బలపడ్డాయి. ఈ నేపథ్యంలో తొలిసారిగా మౌనం వీడిన ధనుష్, ఈ పుకార్లకు చెక్ పెట్టారు.

ఆయన మాట్లాడుతూ.. "నా గురించి ఎన్నో పుకార్లు ప్రచారంలో ఉన్నాయి. నా వెనుక కొందరు వ్యక్తులు ఉన్నారని, మరికొందరు నాకు అండగా నిలుస్తున్నారని రకరకాలుగా చెబుతున్నారు. కానీ, వాస్తవం అది కాదు. దేవుడు నన్ను నడిపిస్తున్నాడు, నా అభిమానులు నా వెన్నంటి ఉన్నారు, ప్రజలు నా పక్షాన నిలుస్తున్నారు. ఇంతకు మించి నా వెనుక ఎవరూ లేరు" అని స్పష్టం చేశారు. దీంతో తనను ఏ రాజకీయ పార్టీ లేదా వ్యక్తి నడిపించడం లేదని ఆయన పరోక్షంగా తెలియ‌జేశారు.

‘ఓమ్’ చిత్రంలో ధనుష్‌తో పాటు మలయాళ సూపర్ స్టార్ మమ్ముట్టి, సాయి పల్లవి, శ్రీలీల కీలక పాత్రలు పోషించారు. ఈ సినిమా ఈ నెల‌ 20న థియేటర్లలో విడుదల కానుంది.

అభిమానులకు క్షమాపణలు 
ఇదిలా ఉండగా.. ‘ఓమ్’ ఆడియో వేడుక జరిగిన ప్రాంగణంలో తీవ్ర గందరగోళం నెలకొంది. సామర్థ్యానికి మించి జనం రావడంతో సరైన పాసులు ఉన్న వేలాది మంది అభిమానులు కూడా లోపలికి ప్రవేశించలేకపోయారు. ఈ ఘటనపై ధనుష్ సోషల్ మీడియా వేదికగా స్పందించారు. జరిగిన అసౌకర్యానికి పూర్తి బాధ్యత తనదేనని అంగీకరిస్తూ, అభిమానులకు క్షమాపణలు చెప్పారు.