‘రామాయణం’లో లక్ష్మణుడి పాత్ర.. లుక్ టెస్ట్ వరకు వెళ్లి ఛాన్స్ మిస్సయ్యా: నటుడు కరణ్ జోత్వానీ

ప్రముఖ దర్శకుడు నితేశ్ తివారీ ‘రామాయణం’ సినిమాలో లక్ష్మణుడి పాత్ర కోసం తాను ఆడిషన్ ఇచ్చానని, తుది దశ వరకు వెళ్లానని ప్రముఖ టీవీ నటుడు కరణ్ జోత్వానీ తాజాగా వెల్లడించాడు. ‘బెబాకీ’ సీరియల్‌తో గుర్తింపు పొందిన ఆయన, ఈ సినిమాకు సంబంధించిన ఓ ఆసక్తికర అనుభవాన్ని ఇన్‌స్టాగ్రామ్‌ వేదికగా పంచుకున్నాడు.

2022 అక్టోబర్‌లో ‘రామాయణం’ చిత్ర సెట్‌లో లక్ష్మణుడి పాత్ర కోసం తాను కాస్ట్యూమ్ ట్రయల్ కూడా పూర్తి చేశానని కరణ్ తెలిపాడు. ఆనాటి లుక్ టెస్ట్ ఫొటోను షేర్ చేస్తూ, ఆ అనుభవం తనకో అద్భుత ప్రపంచాన్ని పరిచయం చేసిందని పేర్కొన్నాడు. ఆడిషన్ ప్రక్రియ ఎంతో స్ఫూర్తిదాయకంగా సాగిందని, ఫలితంతో సంబంధం లేకుండా అంకితభావంతో పనిచేయాలనే నమ్మకాన్ని ఆ చర్చలు తనకు నేర్పాయని రాసుకొచ్చాడు.

అయితే, ఈ పాత్ర తనకు దక్కనప్పటికీ, లక్ష్మణుడిగా నటించిన రవి దూబేపై కరణ్ ప్రశంసలు కురిపించాడు. "లక్ష్మణుడి పాత్రకు రవి ప్రాణం పోసిన తీరు అద్భుతమని వింటున్నాను. టీవీ రోజుల్లో నుంచే ఆయనంటే నాకు ఎంతో అభిమానం" అని పేర్కొన్నాడు. ఈ చిత్రంలో రాముడి పాత్ర పోషిస్తున్న రణ్‌బీర్ కపూర్ తన ఫేవరెట్ నటుడని చెబుతూ, దర్శకుడు నితేశ్ తివారీతో పాటు మొత్తం చిత్ర బృందానికి శుభాకాంక్షలు తెలిపాడు.

‘రామాయణం: పార్ట్ 1’ ఈనెల 5న ప్రపంచవ్యాప్తంగా విడుదలైంది. ఈ చిత్రంలో రాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్, హనుమంతుడిగా సన్నీ డియోల్ నటిస్తున్నారు.