హత్య కేసు నిందితుడికి బెయిల్.. బైక్ ర్యాలీతో హీరోలా స్వాగతం!

బాలుడి హత్య కేసులో నిందితుడిగా ఉన్న వ్యక్తి బెయిల్‌పై విడుదల కాగా, అనుచరులు అతడికి హీరోలా స్వాగతం పలికారు. పూలమాలలు వేసి, భారీ బైక్ ర్యాలీ నిర్వహించారు. కారు బానెట్‌పై కూర్చుని సిగరెట్ తాగుతూ నిందితుడు హల్‌చల్ చేసిన వీడియో సోషల్ మీడియాలో వైరల్ కావడంతో ఈ ఘటనపై తీవ్ర విమర్శలు వెల్లువెత్తుతున్నాయి. మధ్యప్రదేశ్‌లోని సత్నా జిల్లాలో జరిగిందీ ఘటన.

సత్నా జిల్లాకు చెందిన మాన్ సింగ్ అలియాస్ బేటు సింగ్రౌల్, 2025 సెప్టెంబర్ 4న జరిగిన ఓ గొడవలో 16 ఏళ్ల సత్యం శుక్లా అనే బాలుడిని ఛాతీపై కాల్చి చంపినట్లు ఆరోపణలు ఎదుర్కొంటున్నాడు. కోల్‌గవాన్ పోలీస్ స్టేషన్ పరిధిలోని ఎఫ్‌సీఐ గోడౌన్ సమీపంలో ఈ ఘటన జరిగింది. ఈ కేసులో అరెస్టయిన మాన్ సింగ్ సుమారు 14 నెలలుగా జైలులో ఉన్నాడు.

ఇటీవల అతడికి బెయిల్ మంజూరు కావడంతో జైలు నుంచి విడుదలయ్యాడు. జైలు బయట వేచి ఉన్న అనుచరులు అతడికి పూలమాలలు వేసి ఘనంగా స్వాగతం పలికారు. అనంతరం జైలు నుంచి సిద్ధార్థ్ కాలనీ వరకు మోటార్‌సైకిళ్లు, ఇతర వాహనాలతో భారీ ఊరేగింపు నిర్వహించారు. ఈ ర్యాలీలో మాన్ సింగ్ ఓ బొలెరో వాహనం బానెట్‌పై కూర్చుని సిగరెట్ తాగుతూ కనిపించాడు. ఈ సమయంలో పాటలు కూడా పెట్టినట్లు సమాచారం.

చట్ట ప్రకారం బెయిల్ పొందడం హక్కు అయినప్పటికీ, తీవ్రమైన హత్య కేసులో నిందితుడిగా ఉన్న వ్యక్తికి ఇలా బహిరంగంగా వేడుక చేయడంపై సర్వత్రా విమర్శలు వినిపిస్తున్నాయి. ఈ ర్యాలీతో ట్రాఫిక్ నిబంధనల ఉల్లంఘన, శాంతిభద్రతల సమస్యలు తలెత్తుతాయని పలువురు ఆందోళన వ్యక్తం చేస్తున్నారు.