చాహల్‌పై ఆర్‌జే మహ్వష్ ఆరోపణలు చేశారా?.. వైరల్ క్లిప్‌లోని అసలు నిజమిదే!

ప్రముఖ క్రికెటర్ యజ్వేంద్ర చాహల్‌, అతడి మాజీ భార్య ధనశ్రీ వర్మ గురించి ఆర్‌జే మహ్వష్ సంచలన ఆరోపణలు చేశారంటూ సోషల్ మీడియాలో ఓ వీడియో క్లిప్ వైరల్ అవుతోంది. గర్భవతిగా ఉన్నప్పుడు ధనశ్రీని చాహల్ మోసం చేశాడని ఆమె మాట్లాడినట్లు ప్రచారం జరుగుతోంది. అయితే, ఈ ప్రచారంలో ఏమాత్రం నిజం లేదని, ఆమె వ్యాఖ్యలను పూర్తిగా అపార్థం చేసుకున్నారని స్పష్టమవుతోంది.

ఇటీవల ఓ పాడ్‌కాస్ట్‌లో మహ్వష్ మాట్లాడుతూ.. తన 19 ఏళ్ల వయసులో అలీగఢ్‌లో నివసిస్తున్నప్పుడు జరిగిన ఓ వ్యక్తిగత అనుభవాన్ని పంచుకుంది. ఫేస్‌బుక్‌లో పరిచయమైన వ్యక్తితో ప్రేమలో పడటం, కుటుంబం నుంచి వ్యతిరేకత రావడం, ఆ తర్వాత అతడు తనను పదేపదే మోసం చేయడంతో మానసికంగా కుంగిపోయానని వివరించింది. అదే వ్యక్తి తర్వాత వేరొకరిని పెళ్లి చేసుకుని, ఆమె గర్భవతిగా ఉన్నప్పుడు మోసం చేసి, చివరికి విడాకులు తీసుకున్నాడని ఆమె తెలిపారు. ఈ సంభాషణలో ఆమె ఎక్కడా యజ్వేంద్ర చాహల్ లేదా ధనశ్రీ వర్మ పేర్లను ప్రస్తావించలేదు.

అయితే, పాడ్‌కాస్ట్‌లోని పూర్తి సంభాషణను కాకుండా, కేవలం కొన్ని భాగాలను కత్తిరించి (ఎడిట్ చేసి) ప్రచారంలో పెట్టడంతో ఈ అపార్థం చోటుచేసుకుంది. దీనికితోడు, మార్చి 2025లో చాహల్, ధనశ్రీ వర్మ విడాకులు తీసుకున్న తర్వాత మహ్వష్, చాహల్ స్నేహంపై గతంలో కొన్ని ఊహాగానాలు వచ్చాయి. అయితే తాము కేవలం స్నేహితులమేనని, తాను సింగిల్‌గానే ఉన్నానని చాహల్ గతంలోనే స్పష్టం చేశాడు. ఈ నేపథ్యాన్ని వాడుకుని కొందరు తప్పుడు ప్రచారానికి తెరలేపారు.

ప్రస్తుతం వైరల్ అవుతున్న ఈ ప్రచారంపై యజ్వేంద్ర చాహల్, ధనశ్రీ వర్మ లేదా ఆర్‌జే మహ్వష్ నుంచి ఎలాంటి అధికారిక ప్రకటన వెలువడలేదు. అయితే, నెటిజన్లు, పలు మీడియా సంస్థలు అసలు నిజాన్ని వివరిస్తూ, మహ్వష్ తన గతాన్ని మాత్రమే పంచుకున్నారని, చాహల్‌పై ఆరోపణలు చేయలేదని స్పష్టం చేస్తున్నాయి.