ఏపీ పరిషత్ ఎన్నికలు.. వర్షాలు, సాంకేతిక సమస్యలతో పలు చోట్ల ఇబ్బందులు

ఏపీలో పరిషత్ ఎన్నికల పోలింగ్ ప్రక్రియ పలు చోట్ల వర్షాలు, సాంకేతిక అవాంతరాల మధ్య కొనసాగుతోంది. పలు జిల్లాల్లో భారీ వర్షాలు కురుస్తున్నప్పటికీ, ఓటర్లు మాత్రం ఉత్సాహంగా తమ ఓటు హక్కును వినియోగించుకుంటున్నారు. వర్షాన్ని సైతం లెక్కచేయకుండా పోలింగ్ కేంద్రాలకు తరలివచ్చి క్యూలైన్లలో వేచి ఉంటున్నారు.

కాకినాడ జిల్లా జగ్గంపేటలోని ప్రభుత్వ ఉన్నత పాఠశాల పోలింగ్ కేంద్రం ప్రాంగణంలోకి భారీగా వర్షపు నీరు చేరడంతో ఓటర్లు, ముఖ్యంగా మహిళలు తీవ్ర ఇబ్బందులు పడ్డారు. అలాగే ప్రకాశం, బాపట్ల జిల్లాల్లోని అద్దంకి, చీరాల, వేటపాలెం, గుడ్లూరు వంటి పలు ప్రాంతాల్లో కురుస్తున్న వర్షాలకు పోలింగ్ కేంద్రాల వద్ద నీరు నిలిచిపోయింది. నెల్లూరు జిల్లా వ్యాప్తంగా మోస్తరు నుంచి భారీ వర్షం కురుస్తుండగా, కావలిలోని కేంద్రాల్లో దట్టమైన మబ్బుల కారణంగా చీకట్లు అలముకున్నాయి.

మరోవైపు, కొన్నిచోట్ల సాంకేతిక సమస్యలు తలెత్తాయి. వెలగపాడు, కమ్మవారిపాలెం పోలింగ్ కేంద్రాల్లో విద్యుత్ సరఫరా నిలిచిపోవడంతో ఓటింగ్ ప్రక్రియ కొంత ఆలస్యంగా మొదలైంది. అయితే, సైదాపురం, జలదంకి మండలాల్లో తెల్లవారుజాము నుంచి వర్షం పడుతున్నా ప్రజలు ఓటు వేసేందుకు ఆసక్తి చూపించారు. మొత్తంగా అక్కడక్కడా ఇబ్బందులు ఎదురవుతున్నా పోలింగ్ ప్రక్రియ ముందుకు సాగుతోంది.