రాప్తాడు ఘటన.. తన సినిమాలపై ట్రోల్స్‌కు సందీప్ రెడ్డి వంగా ఘాటు కౌంటర్!

ఏపీలోని అనంతపురం జిల్లా రాప్తాడులో ఇటీవల ఓ పాఠశాలలో విద్యార్థినులపై జరిగిన అమానుష దాడికి తన సినిమాలే కారణమంటూ వస్తున్న విమర్శలపై ప్రముఖ దర్శకుడు సందీప్ రెడ్డి వంగా తీవ్రంగా స్పందించారు. తన 'ఎక్స్‌' ఖాతా ద్వారా విమర్శకులకు గట్టి సమాధానమిచ్చారు. ఒక దారుణమైన నేరం జరిగినప్పుడు సానుభూతి చూపడం మానేసి, సినిమాను సులభంగా బలిపశువును చేస్తున్నారని ఆయన మండిపడ్డారు. 

"ఒక కిరాతకమైన నేరం జరిగినప్పుడు, ముందుగా బాధితుల పట్ల సానుభూతి చూపాలి. సమస్య మూలాలను అర్థం చేసుకోవాలి. అంతేగానీ, సినిమాను బలిపశువును చేయకూడదు" అని సందీప్ తన పోస్ట్‌లో పేర్కొన్నారు. 

"ఈ విషాదాన్ని చూసి మీరు బాధితుల గురించి ఆందోళన చెందడం లేదు, దాన్ని అడ్డం పెట్టుకుని మీ వ్యక్తిగత కక్షలు తీర్చుకోవడానికి ఒక మురికి సాకుగా వాడుకుంటున్నారని స్పష్టమవుతోంది" అంటూ తీవ్ర వ్యాఖ్యలు చేశారు.

తన పోస్ట్ ఎవరిని ఉద్దేశించిందో కూడా సందీప్ స్పష్టం చేశారు. "ఈ వ్యాఖ్యలు ముఖ్యంగా విఫలమైన, ఫ్రస్ట్రేషన్ లో ఉన్న నటీనటులు, కొందరు దర్శకులు, కొందరు నిర్మాతలు, పరాన్నజీవుల కోసమే. ఇతరుల పనిని విమర్శించే అవకాశం దొరికినప్పుడల్లా వీరంతా హఠాత్తుగా సంఘ సంస్కర్తలుగా మారిపోతుంటారు. విషాదానికి సానుభూతి కావాలి, అవకాశవాదం కాదు. ఈ తేడాను తెలుసుకోండి" అని పేర్కొన్నారు.