కివీస్ గడ్డపై సచిన్ రికార్డుపై కన్నేసిన కోహ్లీ.. కావాల్సింది 139 పరుగులే!

టీమిండియా స్టార్ బ్యాటర్ విరాట్ కోహ్లీ మరో అరుదైన రికార్డుకు చేరువలో ఉన్నాడు. మాస్టర్ బ్లాస్టర్ సచిన్ టెండూల్కర్ పేరిట ఉన్న ఒక రికార్డును అధిగమించేందుకు సిద్ధమవుతున్నాడు. న్యూజిలాండ్ గడ్డపై వన్డేల్లో అత్యధిక పరుగులు చేసిన భారత బ్యాటర్‌గా నిలిచేందుకు కోహ్లీకి కేవలం 139 పరుగులు మాత్రమే అవసరం. కివీస్‌తో జరగబోయే ఐదు వన్డేల సిరీస్‌లో కోహ్లీ ఈ మైలురాయిని అందుకునే అవకాశం ఉంది.

ప్రస్తుతం ఈ జాబితాలో సచిన్ టెండూల్కర్ అగ్రస్థానంలో ఉన్నాడు. మాస్ట‌ర్ బ్లాస్ట‌ర్‌ న్యూజిలాండ్‌లో 18 వన్డేలు ఆడి 652 పరుగులు చేశారు. మరోవైపు విరాట్ కోహ్లీ ఇప్పటివరకు 11 మ్యాచుల్లో 514 పరుగులు సాధించాడు. ఈ సిరీస్‌లో మరో 139 పరుగులు చేస్తే సచిన్‌ను అధిగమించి కివీస్ గడ్డపై అత్యధిక వన్డే పరుగులు చేసిన భారత బ్యాటర్‌గా కోహ్లీ నిలుస్తాడు.

ఈ జాబితాలో సచిన్ తర్వాత 598 పరుగులతో వీరేంద్ర సెహ్వాగ్ రెండో స్థానంలో ఉండగా.. కోహ్లీ మూడో స్థానంలో ఉన్నాడు. వారి తర్వాత ఎంఎస్ ధోని, రాహుల్ ద్రవిడ్ ఉన్నారు. న్యూజిలాండ్‌లో కోహ్లీకి మంచి రికార్డు ఉంది. అక్కడ ఒక సెంచరీ, నాలుగు హాఫ్ సెంచరీలు నమోదు చేశాడు. కివీస్‌పై కోహ్లీ అత్యధిక స్కోరు 123 పరుగులు. సిరీస్‌లో భాగంగా తొలి వన్డే రేపు ఆక్లాండ్‌లోని ఈడెన్ పార్క్‌లో జరగనుంది.