మరో వాణిజ్య నౌకపై దాడి.. భారతీయుడి మృతి.. వెంటనే దాడులు ఆపాలన్న భారత్‌

ఒమన్‌ తీరంలో భారతీయ సిబ్బందితో ప్రయాణిస్తున్న వాణిజ్య నౌకపై జరిగిన దాడిలో ఓ నావికుడు ప్రాణాలు కోల్పోయాడు. ఈ ఘటనపై భారత్‌ తీవ్ర ఆందోళన వ్యక్తం చేసింది. వాణిజ్య నౌకలు, వాటిలో పనిచేసే సామాన్య నావికులపై దాడులు వెంటనే ఆపాలని మరోసారి స్పష్టం చేసింది. అంతర్జాతీయ జలాల్లో నౌకల రాకపోకలకు ఎలాంటి ఆటంకాలు కలగకుండా చూడాలని కోరింది.

భారత జెండాతో ప్రయాణిస్తున్న ‘ఎంఎస్‌వీ అల్‌ జుసుఫీ’ అనే నౌక సోమవారం ఒమన్‌ తీరంలో లిమా ప్రాంతం సమీపంలో ప్రయాణిస్తుండగా దాడికి గురైంది. నౌకలో మొత్తం 14 మంది భారతీయులు ఉన్నారు. వారిలో 13 మందిని సురక్షితంగా రక్షించారు. మరో నావికుడు తీవ్రంగా గాయపడి ప్రాణాలు కోల్పోయాడు. మృతుడిని గుజరాత్‌కు చెందిన గంధర్‌ నహీమ్‌ అజీజ్‌గా గుర్తించారు. నౌకను గుర్తుతెలియని వైమానిక వస్తువు ఢీకొట్టినట్లు కేంద్ర నౌకాయాన శాఖ మంత్రి సర్బానంద సోనోవాల్‌ వెల్లడించారు. అయితే దాడికి సంబంధించిన మరిన్ని వివరాలు ఇంకా తెలియాల్సి ఉంది.

ఒమన్‌లోని భారత రాయబార కార్యాలయం అక్కడి అధికారులతో సమన్వయం చేసుకుంటోంది. ప్రాణాలతో బయటపడిన 13 మంది నావికులకు అవసరమైన సహాయం అందిస్తోంది. వారిని భారత్‌కు తీసుకొచ్చేందుకు ఏర్పాట్లు చేస్తున్నట్లు సమాచారం. మృతుడి భౌతికకాయాన్ని స్వదేశానికి తరలించే ప్రక్రియ కూడా కొనసాగుతోంది. 

ఒమన్‌ తీరంలో జరిగిన తాజా ఘటనతో అంతర్జాతీయ సముద్ర మార్గాల్లో నౌకల భద్రతపై ఆందోళనలు పెరిగాయి. ముఖ్యంగా హర్మూజ్‌ జలసంధి పరిసరాల్లో వాణిజ్య నౌకలపై దాడులు ఎక్కువవుతున్నాయి. ఫిబ్రవరి 28 నుంచి ఇప్పటివరకు 120కి పైగా వాణిజ్య నౌకలు దాడులకు గురైనట్లు అంతర్జాతీయ సముద్ర సంస్థ, యూకే మారిటైమ్‌ ట్రేడ్‌ ఆపరేషన్స్‌ గణాంకాలను ఉటంకిస్తూ నివేదికలు వెల్లడించాయి. అక్టోబర్‌లోనే 29 నౌకలపై దాడులు జరిగినట్లు సమాచారం. 

వాణిజ్య నౌకలు, వాటిలో పనిచేసే నావికులపై దాడులు జరగడం తీవ్ర ఆందోళనకరమని భారత్‌ పేర్కొంది. అంతర్జాతీయ జలాల్లో నౌకల రాకపోకలు, వాణిజ్యానికి ఎలాంటి ఆటంకాలు కలగకూడదని స్పష్టం చేసింది. ఉద్రిక్తతలను తగ్గించేందుకు చర్చలు, దౌత్యపరమైన ప్రయత్నాలు జరగాలని కోరింది. సముద్ర మార్గాల్లో శాంతి, భద్రత పునరుద్ధరణకు అన్ని దేశాలు కృషి చేయాలని భారత్‌ తన వైఖరిని మరోసారి స్పష్టం చేసింది.