పెనుకొండ మున్సిపాలిటీలో వైసీపీకి సున్నా.. మొత్తం వార్డులు కూటమికే

ఆంధ్రప్రదేశ్‌లో వెలువడుతున్న మున్సిపల్ ఎన్నికల ఫలితాల్లో అధికార కూటమి ప్రభంజనం సృష్టిస్తోంది. శ్రీసత్యసాయి జిల్లా పెనుకొండ మున్సిపాలిటీని టీడీపీ-జనసేన-బీజేపీ కూటమి క్లీన్ స్వీప్ చేసింది. మున్సిపాలిటీ పరిధిలోని మొత్తం 23 వార్డులను కైవసం చేసుకుని, ప్రతిపక్ష వైఎస్సార్ కాంగ్రెస్ పార్టీకి ఒక్క స్థానం కూడా దక్కకుండా చేసింది.

వివరాల్లోకి వెళ్తే, పెనుకొండ మున్సిపల్ ఎన్నికల ఓట్ల లెక్కింపులో కూటమి పూర్తి ఆధిపత్యాన్ని ప్రదర్శించింది. గెలుపొందిన 23 వార్డులలో తెలుగుదేశం పార్టీ 21 స్థానాల్లో విజయం సాధించింది. కూటమిలోని మిత్రపక్షాలైన జనసేన, బీజేపీలు చెరొక వార్డులో గెలుపొందాయి.

ఈ ఎన్నికల్లో వైసీపీ ఒక్క వార్డులోనూ గెలవలేకపోయింది. దీంతో పెనుకొండ మున్సిపల్ పాలకవర్గం మొత్తం కూటమి చేతికి వచ్చినట్లయింది. ఈ ఫలితాలతో కూటమి శ్రేణులు సంబరాలు చేసుకుంటున్నాయి.