సుదీర్ఘ నిరీక్షణకు తెర.. ఏడు నెలల తర్వాత లాయర్‌ను కలిసిన ఇమ్రాన్ ఖాన్

పాకిస్థాన్ మాజీ ప్రధాని ఇమ్రాన్ ఖాన్ ఏడు నెలల సుదీర్ఘ విరామం తర్వాత సోమవారం తన న్యాయవాదిని కలిశారు. రావల్పిండిలోని కట్టుదిట్టమైన భద్రత ఉండే అదియాలా జైల్లో ఈ సమావేశం జరిగింది. అనేకసార్లు దరఖాస్తు చేసుకున్న అనంతరం జైలు అధికారులు ఈ భేటీకి అనుమతించినట్లు తెలుస్తోంది. ఇమ్రాన్ ఖాన్‌తో పాటు ఆయన భార్య బుష్రా బీబీ కూడా దాదాపు 11 నెలల తర్వాత తమ న్యాయవాది బారిస్టర్ సల్మాన్ సఫ్దర్‌ను కలిశారు.

సోమవారం సాయంత్రం 4:30 గంటల సమయంలో సుమారు 40 నిమిషాల పాటు ఈ సమావేశం సాగింది. ఈ విషయాన్ని న్యాయవాది సల్మాన్ సఫ్దర్ సోషల్ మీడియా ద్వారా వెల్లడించారు. అయితే, ఇమ్రాన్ ఖాన్‌పై ఉన్న అనేక కేసుల గురించి చర్చించడానికి ఈ సమయం ఏమాత్రం సరిపోలేదని ఆయన అభిప్రాయపడ్డారు. 

ఈ కొద్ది సమయంలోనే ఇమ్రాన్, బుష్రా బీబీ తమ ఆరోగ్యం, జైలులో జీవన పరిస్థితుల గురించి వివరించారని తెలిపారు. అదేవిధంగా కొన్ని కీలకమైన న్యాయపరమైన అంశాలపై కొత్తగా సూచనలు, సలహాలు ఇచ్చారని సఫ్దర్ పేర్కొన్నారు.

గత ఏడాది ఆగస్టు నుంచి ఇమ్రాన్ ఖాన్ జైలు జీవితం గడుపుతున్నారు. ఆయనపై అవినీతి, దేశద్రోహం సహా పలు కేసులు నమోదయ్యాయి. న్యాయస్థానాలు పలుమార్లు ఆయనను కుటుంబ సభ్యులు, న్యాయవాదులతో క్రమం తప్పకుండా కలిసేందుకు అనుమతులు ఇచ్చాయి. 

అయినప్పటికీ, గత కొన్ని నెలలుగా జైలు అధికారులు సమావేశాలకు ఆటంకాలు కల్పిస్తున్నారని, ఆంక్షలు విధిస్తున్నారని ఇమ్రాన్ లీగల్ టీమ్ ఆరోపిస్తోంది. ఈ నేపథ్యంలో ఏడు నెలల తర్వాత జరిగిన ఈ సమావేశం ప్రాధాన్యత సంతరించుకుంది. ఈ భేటీలో అందిన సూచనల మేరకు న్యాయవాదుల బృందం తమ తదుపరి కార్యాచరణను సిద్ధం చేసుకునే అవకాశం ఉంది.