బద్వేలు మున్సిపాలిటీ కూటమి కైవసం.. క్లీన్‌స్వీప్‌తో సంపూర్ణ విజయం

ఆంధ్రప్రదేశ్ మున్సిపల్ ఎన్నికల ఫలితాల్లో అధికార టీడీపీ కూటమి హవా కొనసాగిస్తోంది. కడప జిల్లాలోని బద్వేలు మున్సిపాలిటీని కూటమి పూర్తిస్థాయిలో కైవసం చేసుకుంది. ఈరోజు జరుగుతున్న ఓట్ల లెక్కింపులో... పోలింగ్ జరిగిన ఏకైక వార్డులోనూ టీడీపీ అభ్యర్థి విజయం సాధించడంతో ఈ క్లీన్‌స్వీప్ పూర్తయింది.

బద్వేలు మున్సిపాలిటీ పరిధిలోని 39వ వార్డుకు జరిగిన ఎన్నికలో టీడీపీ అభ్యర్థి తుడిమెళ్ల విజయ 372 ఓట్ల మెజార్టీతో విజయం సాధించారు. మొత్తం 40 వార్డులున్న ఈ మున్సిపాలిటీలో కేవలం ఈ ఒక్క వార్డుకు మాత్రమే పోలింగ్ నిర్వహించారు. మిగిలిన 39 వార్డులు ఇప్పటికే ఏకగ్రీవం అయ్యాయి.

ఎన్నికలకు ముందే మున్సిపల్ ఛైర్‌పర్సన్ పీఠాన్ని టీడీపీ అభ్యర్థి సోమేశుల దివ్య తేజ ఏకగ్రీవంగా గెలుచుకున్నారు. ఏకగ్రీవమైన 39 వార్డుల్లో టీడీపీ 35 స్థానాలు, జనసేన 2 స్థానాలు గెలుచుకోగా, మరో రెండు స్థానాలను స్వతంత్ర అభ్యర్థులు దక్కించుకున్నారు. తాజాగా 39వ వార్డులోనూ టీడీపీ గెలవడంతో బద్వేలు మున్సిపల్ కౌన్సిల్‌పై కూటమి సంపూర్ణ ఆధిపత్యాన్ని సాధించినట్లయింది. ఈ విజయంతో కూటమి శ్రేణులు సంబరాలు చేసుకుంటున్నాయి.