జయ న‌న్ను అలా పిలవడం మా నాన్నకు నచ్చలేదు.. పెళ్లి నాటి సీక్రెట్ చెప్పిన అమితాబ్

బాలీవుడ్ మెగాస్టార్ అమితాబ్ బచ్చన్, తన వైవాహిక జీవితానికి సంబంధించిన ఒక సరదా విషయాన్ని బయటపెట్టారు. తనకు, జయ బచ్చన్‌కు కొత్తగా పెళ్లయిన రోజుల్లో జరిగిన ఓ ఆసక్తికరమైన సంఘటనను గుర్తుచేసుకున్నారు. ప్రముఖ క్విజ్ రియాలిటీ షో 'కౌన్ బనేగా కరోడ్‌పతి' వేదికగా నటుడు రణ్‌బీర్ కపూర్‌తో మాట్లాడుతూ ఆయన ఈ విషయాన్ని పంచుకున్నారు.

జయ బచ్చన్ చాలా ఏళ్లపాటు తనను ప్రేమగా 'లంబు జీ' అని పిలిచేవారని అమితాబ్ తెలిపారు. అయితే, తన తండ్రి హరివంశరాయ్ బచ్చన్ ఒకరోజు జోక్యం చేసుకుని, అలా పిలవొద్దని జయకు సూచించారని వెల్లడించారు. "చాలా ఏళ్లపాటు ఆమె నన్ను లంబు జీ అని పిలిచేవారు. కానీ మా నాన్నగారు ఆమెను వారించారు. 'అలా పిలవద్దు, అతని పేరుతో పిలువు లేదా మరేదైనా పదం వాడు' అని ఆయన చెప్పడంతో, అప్పటి నుంచి ఆమె నా పేరుతో పిలవడం మొదలుపెట్టారు" అని అమితాబ్ వివరించారు.

ఈ సరదా సంభాషణ బచ్చన్, కపూర్ కుటుంబాల్లోని సభ్యుల ఎత్తుల తేడాపై చర్చ వచ్చినప్పుడు మొదలైంది. ఈ సందర్భంగా రణ్‌బీర్ కపూర్ కూడా తన మనసులోని ఓ ఫన్నీ ఆలోచనను పంచుకున్నారు. "నేనేమో అమిత్ జీ అంత పొడవుగా, అలియా ఏమో జయా ఆంటీ అంత పొట్టిగా ఉంటే ఫొటోల్లో మా జంట చూడటానికి బాగుంటుందని, ఎత్తుల తేడా చక్కగా కనిపిస్తుందని ఎప్పుడూ అనుకునేవాడిని" అని రణ్‌బీర్ అన్నారు.

దీనికి అమితాబ్ నవ్వుతూ.. "ఓహో, మీ ఇద్దరి ఎత్తుల్లో చాలా తేడా ఉంది సార్" అని చమత్కరించారు. వెంటనే రణ్‌బీర్ కపూర్ "మరి మీ ఇద్దరి మధ్య ఎత్తుల తేడా ఎంత సార్?" అని అడిగారు. దీనికి అమితాబ్ బదులిస్తూ.. "నా ఎత్తు 6 అడుగుల 2 అంగుళాలు, జయ ఎత్తు బహుశా 5 అడుగుల 3 లేదా 4 అంగుళాలు ఉంటుంది" అని తెలిపారు. దాంతో రణ్‌బీర్.. "అయితే మా జంట ఎత్తుల తేడా కూడా దాదాపు అలాగే ఉంటుంది సార్" అని సంభాషణను ముగించారు. ప్రస్తుతం ఈ సరదా క్లిప్ సోషల్ మీడియాలో వైరల్ అవుతోంది.