ఎర్రన్నాయుడు వర్ధంతి: ఘనంగా నివాళులర్పించిన చంద్రబాబు, లోకేశ్

టీడీపీ సీనియర్ నేత, కేంద్ర మాజీ మంత్రి స్వర్గీయ కింజరాపు ఎర్రన్నాయుడు వర్ధంతి సందర్భంగా ముఖ్యమంత్రి నారా చంద్రబాబు నాయుడు, రాష్ట్ర మంత్రి నారా లోకేశ్ ఆయనకు ఘనంగా నివాళులర్పించారు. సోషల్ మీడియా వేదికగా ఎర్రన్నాయుడితో తమకున్న అనుబంధాన్ని, ఆయన అందించిన నిరుపమాన ప్రజాసేవను ఈ సందర్భంగా వారు స్మరించుకున్నారు.

ఈ సందర్భంగా చంద్రబాబు నాయుడు స్పందిస్తూ.. ఎర్రన్నాయుడు తనకు అత్యంత ఆప్తుడని పేర్కొన్నారు. "ఉత్తరాంధ్ర ముద్దుబిడ్డగా, టీడీపీలో కీలక బీసీ నేతగా, మచ్చలేని నాయకుడిగా రాజకీయాల్లో ఆయన తనదైన ప్రత్యేకతను చాటుకున్నారు. నిరంతరం ప్రజాసేవకే పరితపించిన ఎర్రన్నాయుడిని ఈ సందర్భంగా స్మరించుకుందాం" అని చంద్రబాబు తన సందేశంలో పేర్కొన్నారు.

మంత్రి నారా లోకేశ్ సైతం ఎర్రన్నాయుడిని స్మరించుకుంటూ, ఆయనను ఒక మహోన్నత నాయకుడిగా కొనియాడారు. "ప్రజాసంక్షేమం, బడుగు బలహీన వర్గాల అభ్యున్నతే ధ్యేయంగా తుదిశ్వాస వరకు శ్రమించిన మహోన్నత నాయకుడు ఎర్రన్నాయుడు గారు. ఉత్తరాంధ్ర ముద్దుబిడ్డగా ఆయన ప్రజల హృదయాల్లో చెరగని స్థానం సంపాదించుకున్నారు. అటు రాష్ట్ర, ఇటు జాతీయ రాజకీయాల్లో తనదైన ముద్ర వేశారు" అని లోకేశ్ పేర్కొన్నారు.