షారుఖ్‌కు బుర్జ్ ఖలీఫా బర్త్‌డే విషెస్.. 'వి లవ్ యూ SRK' అంటూ సందేశం!

బాలీవుడ్ బాద్‌షా, కింగ్‌ఖాన్ షారుఖ్ ఖాన్ 61వ పుట్టినరోజును పురస్కరించుకుని నవంబర్ 2న దుబాయ్‌లోని ప్రపంచ ప్రఖ్యాత బుర్జ్ ఖలీఫా ప్రత్యేక రీతిలో ఆయనకు శుభాకాంక్షలు తెలిపింది. షారుఖ్ చిత్రాన్ని ప్రదర్శిస్తూ.. "WE LOVE YOU SRK" అనే సందేశంతో ఈ ఆకాశహర్మ్యం వెలిగిపోయింది. ప్రతీ ఏడాదిలాగే ఈసారి కూడా షారుఖ్ పుట్టినరోజు వేడుకల్లో బుర్జ్ ఖలీఫా భాగమైంది.

మరోవైపు, ముంబైలోనూ వేడుకలు అంబరాన్నంటాయి. షారుఖ్ నటిస్తున్న కొత్త చిత్రం 'కింగ్'కు గుర్తుగా బాంద్రా-వర్లీ సీ లింక్‌ను ప్రత్యేక లైట్లతో అలంకరించారు. ఈ దృశ్యాన్ని ఫొటో తీసిన షారుఖ్, దానిని 'ఎక్స్'లో పోస్ట్ చేస్తూ తనకు 'కింగ్-సైజ్ లవ్' అందించినందుకు గూగుల్ జెమినీకి ధన్యవాదాలు తెలిపాడు. ఆ క్షణాన్ని ఆస్వాదించడానికి తాను డ్రైవ్‌కు వెళ్లినట్లు పేర్కొన్నాడు.

అంతేకాకుండా, ముంబైలోని ఆయన నివాసం 'మన్నత్' వద్ద కూడా సందడి వాతావరణం నెలకొంది. 'కింగ్' సినిమా విజువల్స్, అభిమానులకు కృతజ్ఞతలు తెలుపుతూ షారుఖ్ చేతిరాతతో రాసిన సందేశాన్ని పెద్ద స్క్రీన్లపై ప్రదర్శించారు. అర్ధరాత్రి సమయంలో షారూఖ్ కొత్త చిత్రం నుంచి 'తూ మిల్ జాయే' అనే మొదటి పాటను విడుదల చేశారు. అరిజిత్ సింగ్ పాడిన ఈ పాటలో ఎడ్ షీరన్ ర్యాప్ ప్రత్యేక ఆకర్షణగా నిలవగా, దీపికా పదుకొణె మరోసారి షారుఖ్‌తో కలిసి తెరపై కనిపించింది. ఈ గ్లోబల్, లోకల్ వేడుకలు కింగ్ ఖాన్ క్రేజ్‌కు నిదర్శనంగా నిలిచాయి.