యూపీఐ ఆల్ టైమ్ రికార్డ్.. రోజువారీ లావాదేవీలు లక్ష కోట్లు!

భారత డిజిటల్ చెల్లింపుల వ్యవస్థలో యూనిఫైడ్ పేమెంట్స్ ఇంటర్‌ఫేస్ (యూపీఐ) సరికొత్త చరిత్ర సృష్టించింది. అక్టోబర్ నెలలో తొలిసారిగా యూపీఐ ద్వారా జరిగిన సగటు రోజువారీ లావాదేవీల విలువ రూ.1 లక్ష కోట్లు దాటింది. పండుగల సీజన్‌లో వినియోగదారులు భారీగా కొనుగోళ్లు జరపడంతో డిజిటల్ చెల్లింపులు రికార్డు స్థాయిలో నమోదయ్యాయి.

నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ) విడుదల చేసిన డేటా ప్రకారం.. అక్టోబర్‌లో యూపీఐ ద్వారా మొత్తం రూ.31.53 లక్షల కోట్ల విలువైన లావాదేవీలు జరిగాయి. నెలవారీ లావాదేవీల విలువ రూ.30 లక్షల కోట్ల మార్కును దాటడం ఇదే మొదటిసారి. 

ఇంతకుముందు 2026 మే నెలలో నమోదైన రూ.29.9 లక్షల కోట్లే అత్యధికం. లావాదేవీల సంఖ్య పరంగా చూస్తే, అక్టోబర్‌లో 25.47 బిలియన్ల ట్రాన్సాక్షన్లు జరిగాయి. అంటే రోజుకు సగటున 821 మిలియన్ల లావాదేవీలు నమోదయ్యాయి. సెప్టెంబర్‌ నెలలో రోజువారీ సగటు లావాదేవీల విలువ సుమారు రూ.98,000 కోట్లుగా ఉంది.

ప్రస్తుత పండుగల సీజన్ అమ్మకాలే ఈ రికార్డు స్థాయి పెరుగుదలకు ప్రధాన కారణంగా నిలుస్తోంది. దీనికి తోడు అక్టోబర్ నెలలో 31 రోజులు ఉండటం కూడా నెలవారీ లావాదేవీల సంఖ్య పెరగడానికి దోహదపడింది. ప్రస్తుతం దేశంలోని మొత్తం డిజిటల్ చెల్లింపుల్లో యూపీఐ వాటా సుమారు 89 శాతంగా ఉంది. దీంతో ఇది దేశంలోనే అత్యంత ఆధిపత్య చెల్లింపుల వేదికగా కొనసాగుతోంది.

ఎండీఆర్ ఛార్జీల వాయిదా ప్రభావం
యూపీఐ లావాదేవీలపై మర్చంట్ డిస్కౌంట్ రేట్ (ఎండీఆర్) ఛార్జీలను ప్రవేశపెట్టాలని ప్రతిపాదనలు వస్తున్న తరుణంలో ఈ రికార్డు వృద్ధి నమోదు కావడం గమనార్హం. వాస్తవానికి ఈ ఛార్జీలను ఎన్‌పీసీఐ గత నెలలోనే అమలు చేయాలని భావించింది. అయితే, పండుగల సీజన్‌లో అమ్మకాలపై ప్రభావం పడుతుందని వ్యాపార సంఘాలు, ఫిన్‌టెక్ కంపెనీలు, పేమెంట్ సర్వీస్ ప్రొవైడర్ల నుంచి విజ్ఞప్తులు రావడంతో దీపావళి తర్వాత వరకు ఈ నిర్ణయాన్ని వాయిదా వేసింది. నవంబర్ రెండో వారంలో దీపావళి ఉండటంతో ఆ తర్వాతే ఎండీఆర్ ఛార్జీల అమలుపై స్పష్టత రానుంది.