పండ్లు తినడంలో ఈ చిన్న మార్పులు చేసుకోండి.. పోషకాలు పుష్కలం!

పండ్లు ఆరోగ్యానికి మంచివని తెలుసు. అందుకే చాలామంది రోజూ ఏదో ఒక పండు తింటుంటారు. మరికొందరు పండ్లతో జ్యూస్‌ చేసుకుని తాగుతారు. అయితే పండ్లలోని పూర్తి పోషకాలు అందాలంటే వాటిని తినే పద్ధతిలోనూ కొన్ని జాగ్రత్తలు అవసరమని పోషకాహార నిపుణురాలు నమామి అగర్వాల్‌ ఎన్డీటీవీ కథనంలో సూచించారు. రోజువారీ ఆహారంలో మూడు రకాల పండ్లను చేర్చుకోవడంతో పాటు, జ్యూస్‌కు బదులుగా నేరుగా పండ్లను తినాలని చెబుతున్నారు.

రోజూ పండ్లు తినాలి
యాపిల్‌, అరటిపండు, నారింజ, బొప్పాయి, జామ వంటి పండ్లలో విటమిన్లు, ఖనిజాలు, యాంటీఆక్సిడెంట్లు, పీచు పదార్థాలు ఉంటాయి. ఇవి శరీరానికి అవసరమైన పోషకాలను అందిస్తాయి. తీపి తినాలనే కోరిక కలిగినప్పుడు ప్యాకెట్‌ స్నాక్స్‌, చక్కెర ఎక్కువగా ఉండే పదార్థాలకు బదులుగా పండ్లను తీసుకోవడం మంచిదని నిపుణురాలు సూచిస్తున్నారు.

భోజనాల మధ్య తీసుకుంటే మంచిది
పండ్లను ప్రధాన భోజనంతో కలిపి తినడం కంటే మధ్యాహ్నం లేదా ఉదయం అల్పాహార సమయాల్లో తీసుకోవాలని సూచిస్తున్నారు. వ్యాయామానికి ముందు కూడా పండ్లు తినవచ్చు. వీటిలో ఉండే సహజ చక్కెర శరీరానికి వేగంగా శక్తిని అందిస్తుంది.

రోజూ 3 రకాల పండ్లు
ఒకే రకం పండుకు పరిమితం కాకుండా రోజూ మూడు రకాల పండ్లను ఆహారంలో చేర్చుకోవాలి. ఒక్కో పండులో ఒక్కో రకమైన విటమిన్లు, ఖనిజాలు, యాంటీఆక్సిడెంట్లు ఉంటాయి. అరటి, యాపిల్‌, నారింజ, బొప్పాయి, జామ వంటి పండ్లను మార్చి మార్చి తీసుకోవడం ద్వారా వివిధ పోషకాలు అందుతాయి.

జ్యూస్‌ వద్దు.. పండ్లనే తినండి
పండ్లను జ్యూస్‌గా చేసుకుని తాగడం కంటే నేరుగా తినడమే మంచిదని నిపుణులు చెబుతున్నారు. జ్యూస్‌ తయారీలో గుజ్జును తొలగిస్తే పీచు పదార్థాలు తగ్గిపోతాయి. అదే పండును పూర్తిగా తింటే ఫైబర్‌ అందుతుంది. ఇది జీర్ణక్రియకు తోడ్పడటంతో పాటు కడుపు నిండిన భావనను ఎక్కువసేపు ఉంచుతుంది.