ఉద్యోగాల్లో దూసుకెళ్తున్న మహిళలు.. ఇంట్లో మాత్రం గొడ్డుచాకిరి!

భారతదేశంలో ఉద్యోగాలు చేసే మహిళల సంఖ్య గణనీయంగా పెరుగుతున్నప్పటికీ, వారిపై ఇంటి పని భారం మాత్రం తగ్గడం లేదు. ఒకవైపు ఉపాధి రంగంలో మహిళలు దూసుకెళ్తుంటే, మరోవైపు గృహ బాధ్యతల్లో వారికి సరైన మద్దతు లభించడం లేదని తాజా నివేదిక ఒకటి స్పష్టం చేస్తోంది. "పార్టిసిపేషన్ పారడాక్స్" పేరుతో ఇండియన్ కౌన్సిల్ ఫర్ రీసెర్చ్ ఆన్ ఇంటర్నేషనల్ ఎకనామిక్ రిలేషన్స్ (ICRIER) విడుదల చేసిన నివేదికలో ఈ కీలక అంశాలు వెల్లడయ్యాయి.

గత ఎనిమిదేళ్లలో భారత శ్రామికశక్తిలో మహిళల భాగస్వామ్యం భారీగా పెరిగింది. నివేదిక ప్రకారం, 2017-18లో 10.4 కోట్లుగా ఉన్న ఉద్యోగినుల సంఖ్య, 2025 నాటికి 20.1 కోట్లకు చేరింది. మొత్తం శ్రామిక శక్తిలో వారి వాటా 22 శాతం నుంచి 38 శాతానికి పెరిగింది. ముఖ్యంగా గ్రామీణ ప్రాంతాల్లో ఈ పెరుగుదల స్పష్టంగా కనిపించింది. పల్లెల్లో మహిళల భాగస్వామ్యం 23.7 శాతం నుంచి 44.9 శాతానికి ఎగబాకగా, పట్టణ ప్రాంతాల్లో 18.2 శాతం నుంచి 25.9 శాతానికి పెరిగింది.

అయితే, ఉద్యోగాల్లో భాగస్వామ్యం పెరిగినంత మాత్రాన ఇంటి పనుల్లో సమానత్వం రాలేదని గణాంకాలు స్పష్టం చేస్తున్నాయి. మహిళలు రోజుకు సగటున 464 నిమిషాలు (సుమారు 7 గంటల 44 నిమిషాలు) ఇంటి పనులకే కేటాయిస్తుండగా, పురుషులు కేవలం 178 నిమిషాలు (సుమారు 3 గంటలు) మాత్రమే వెచ్చిస్తున్నారు. అంటే, పురుషుల కంటే మహిళలు ప్రతిరోజూ దాదాపు నాలుగు గంటల 46 నిమిషాలు అదనంగా ఇంటి బాధ్యతలు మోస్తున్నారు.

ఈ అసమానత కారణంగా మహిళల విశ్రాంతి సమయం కూడా తగ్గిపోతోంది. 2019లో పురుషులు, మహిళల మధ్య విశ్రాంతి సమయం తేడా 57 నిమిషాలు ఉండగా, 2024 నాటికి అది 70 నిమిషాలకు పెరిగింది. సర్వేలో పాల్గొన్న మహిళల్లో సుమారు 60 శాతం మంది ఇంటి పనులు, పిల్లల సంరక్షణ కారణంగానే తాము బయటకు వెళ్లి ఉద్యోగాలు చేయలేకపోతున్నామని తెలిపారు. అదే పురుషుల్లో కేవలం ఒకశాతం మాత్రమే ఈ కారణాలను చూపడం గమనార్హం.

వేతనాల విషయంలోనూ ఈ వ్యత్యాసం కొనసాగుతోంది. గ్రామీణ ప్రాంతాల్లో పురుషుల వేతనాలతో పోలిస్తే మహిళలు 45 శాతం మాత్రమే పొందుతుండగా, పట్టణ ప్రాంతాల్లో ఇది 61 శాతంగా ఉంది. మొత్తంగా, మహిళలు ఆర్థిక స్వాతంత్ర్యం వైపు అడుగులు వేస్తున్నప్పటికీ.. ఉద్యోగంలో ఒక షిఫ్టు, ఇంట్లో మరో షిఫ్టుతో రెట్టింపు భారాన్ని మోస్తున్నారని ఈ నివేదిక స్పష్టం చేస్తోంది.