4, 6, 6, 6, 6.. ఒకే ఓవర్‌లో 32 రన్స్‌.. చెత్త రికార్డు జాబితాలో నితీశ్ రెడ్డి!

న్యూజిలాండ్‌తో ఆక్లాండ్‌లోని ఈడెన్‌ పార్క్‌ వేదికగా శుక్రవారం జరిగిన నాలుగో టీ20లో భారత ఆల్‌రౌండర్‌ నితీశ్‌ కుమార్‌ రెడ్డి చెత్త రికార్డు జాబితాలో చేరాడు. అతడు వేసిన 16వ ఓవర్‌లో న్యూజిలాండ్‌ బ్యాటర్‌ గ్లెన్‌ ఫిలిప్స్‌ చెలరేగిపోయాడు. ఆ ఓవర్‌లో ఏకంగా 32 పరుగులు వచ్చాయి. దీంతో టీ20 అంతర్జాతీయ క్రికెట్‌లో ఒకే ఓవర్‌లో అత్యధిక పరుగులు సమర్పించుకున్న భారత బౌలర్ల జాబితాలో దూబే తర్వాతి స్థానంలో నితీశ్‌ నిలిచాడు.

ఆ ఓవర్‌ రెండో బంతిని నితీశ్‌ నోబాల్‌గా వేయగా.. ఫిలిప్స్‌ దాన్ని బౌండరీకి తరలించాడు. ఫ్రీహిట్‌పై రెండు పరుగులు తీశాడు. ఆ తర్వాత వరుసగా నాలుగు బంతులను సిక్సర్లుగా మలిచాడు. దీంతో ఒక్క ఓవర్‌లోనే 32 పరుగులు వచ్చాయి. ఫిలిప్స్‌ ధాటికి భారత బౌలర్లు ఒత్తిడిలో పడ్డారు. 

గతంలో 2016లో వెస్టిండీస్‌తో జరిగిన టీ20లో స్టువర్ట్‌ బిన్నీ కూడా ఒకే ఓవర్‌లో 32 పరుగులు సమర్పించుకున్నాడు. భారత బౌలర్లలో ఈ జాబితాలో శివమ్‌ దూబే అగ్రస్థానంలో ఉన్నాడు. 2020లో న్యూజిలాండ్‌తో జరిగిన మ్యాచ్‌లో అతడు ఒక ఓవర్‌లో 34 పరుగులు ఇచ్చాడు. నితీశ్‌ 32 పరుగులు ఇవ్వడంతో బిన్నీ సరసన చేరాడు.

ఈ మ్యాచ్‌లో ఫిలిప్స్‌ మొత్తం 49 బంతుల్లో 107 పరుగులు చేసి సెంచరీ సాధించాడు. అతడి ఇన్నింగ్స్‌లో ఆరు ఫోర్లు, పది సిక్సర్లు ఉన్నాయి. మైకేల్‌ బ్రేస్‌వెల్‌ 25 బంతుల్లో 65 పరుగులు చేయడంతో న్యూజిలాండ్‌ 20 ఓవర్లలో 7 వికెట్లకు 259 పరుగులు చేసింది. నితీశ్‌ తన నాలుగు ఓవర్లలో 64 పరుగులు ఇచ్చి ఒక వికెట్‌ తీశాడు.