డబ్బు దాచుకోవడం దండగేనా? భవిష్యత్తులో అసలు పొదుపే అవసరం ఉండదంటున్న ఎలాన్‌ మస్క్‌.. ఎందుకో తెలుసా?

భవిష్యత్తు కోసం డబ్బు పొదుపు చేస్తున్నారా? అయితే ఇకపై అలా చేయాల్సిన అవసరమే ఉండకపోవచ్చని అంటున్నారు ప్రపంచ కుబేరుడు, టెస్లా, స్పేస్‌ఎక్స్‌ అధినేత ఎలాన్‌ మస్క్‌. కృత్రిమ మేధ (ఏఐ), రోబోలు ప్రపంచ ఆర్థిక వ్యవస్థను పూర్తిగా మార్చేస్తాయని, భవిష్యత్తులో వస్తువులు, సేవలు సమృద్ధిగా అందుబాటులోకి వస్తాయని ఆయన అంచనా వేస్తున్నారు. అలాంటి పరిస్థితుల్లో భవిష్యత్తు కోసం డబ్బు దాచుకోవడం అర్థరహితంగా మారుతుందని తాజాగా సోషల్‌ మీడియా వేదికగా వ్యాఖ్యానించారు. 

ఎక్స్‌ వేదికపై ఓ యూజర్‌ చేసిన వ్యాఖ్యకు స్పందిస్తూ మస్క్‌ ఈ అభిప్రాయాన్ని వ్యక్తం చేశారు. సూపర్‌ ఇంటెలిజెంట్‌ ఏఐ అందుబాటులోకి వస్తే, భవిష్యత్తు కోసం డబ్బు పొదుపు చేయడం నిరర్థకమవుతుందని పేర్కొన్నారు.

మస్క్‌ వాదన ప్రకారం.. ప్రస్తుతం మనుషులు ఆహారం, ఇల్లు, రవాణా, వైద్యం, వినోదం వంటి అవసరాల కోసం డబ్బు సంపాదిస్తున్నారు. అయితే అత్యాధునిక ఏఐ వ్యవస్థలు, హ్యూమనాయిడ్‌ రోబోలు ఈ వస్తువులను, సేవలను భారీ స్థాయిలో ఉత్పత్తి చేయగలిగితే వాటి ధరలు గణనీయంగా తగ్గవచ్చు. ప్రజల అవసరాలకు మించి ఉత్పత్తి జరిగే పరిస్థితి వస్తే డబ్బు ప్రాధాన్యం కూడా తగ్గిపోతుందని ఆయన భావిస్తున్నారు.

గతంలోనూ మస్క్‌ ఇలాంటి అంచనాలే వేశారు. 2026 జులైలో ‘ది ఎకనామిస్ట్‌’కు ఇచ్చిన ఇంటర్వ్యూలో, ఏఐ, రోబోలు మానవులు వినియోగించగల పరిమాణానికి మించి వస్తువులు, సేవలను అందించగలిగితే 2036 నాటికి డబ్బు ప్రాధాన్యం గణనీయంగా తగ్గవచ్చని అన్నారు. ఏఐ అభివృద్ధి ఇదే వేగంతో కొనసాగితే సుమారు ఐదేళ్లలో అది మానవాళి మొత్తం మేధస్సును మించవచ్చని కూడా ఆయన అంచనా వేశారు.

ఏఐ, రోబోలు అనేక పనులను మనుషుల కంటే వేగంగా, తక్కువ ఖర్చుతో చేయగలిగితే ఉద్యోగాల స్వరూపం మారుతుందని మస్క్‌ చెబుతున్నారు. భవిష్యత్తులో జీవనాధారం కోసం తప్పనిసరిగా ఉద్యోగం చేయాల్సిన అవసరం తగ్గవచ్చని, ఇష్టముంటేనే పని చేసే పరిస్థితి రావచ్చని ఆయన అభిప్రాయం.

ప్రభుత్వాలు ప్రజలకు నేరుగా ఆదాయం అందించే విధానాలను అనుసరించాల్సి రావచ్చని కూడా గతంలో సూచించారు. అయితే ఇలాంటి వ్యవస్థలు ఎలా అమలవుతాయి? ఉద్యోగాలు కోల్పోయేవారికి ఆదాయం ఎలా అందుతుంది? ఏఐ సృష్టించే సంపద అందరికీ సమానంగా చేరుతుందా? అనే ప్రశ్నలకు ఇంకా స్పష్టమైన సమాధానాలు లేవు. 

మస్క్‌ వ్యాఖ్యలు ఆసక్తికరంగా ఉన్నప్పటికీ, వాటిని ఆధారంగా చేసుకుని పొదుపు ఆపేయడం సరైన నిర్ణయం కాదు. ఏఐ వల్ల ఉత్పత్తి పెరిగినా దాని ప్రయోజనాలు అందరికీ ఒకేలా అందుతాయని హామీ లేదు. ఆర్థిక అసమానతలు, ఉద్యోగాల్లో మార్పులు, వైద్యం, గృహ వసతి వంటి సేవల లభ్యత కూడా కీలకంగా ఉంటాయి.

కాబట్టి మస్క్‌ చెబుతున్నది భవిష్యత్తుపై ఆయనకున్న ఆశావాద దృక్పథం మాత్రమేనని నిపుణులు చెబుతున్నారు. ప్రస్తుత పరిస్థితుల్లో అత్యవసర అవసరాలు, కుటుంబ బాధ్యతలు, పదవీ విరమణ వంటి లక్ష్యాల కోసం ఆర్థిక ప్రణాళికను కొనసాగించడం ముఖ్యమని సూచిస్తున్నారు. ఏఐ ప్రపంచాన్ని ఎంతగా మార్చుతుందో కాలమే నిర్ణయించాలని అభిప్రాయపడ్డారు.