ఆ చట్టంతో డిజిటల్ మీడియా స్వేచ్ఛకు ముప్పు లేదు: కేంద్రమంత్రి అశ్విని వైష్ణవ్ స్పష్టత

డిజిటల్ పర్సనల్ డేటా ప్రొటెక్షన్ (డీపీడీపీ) చట్టం-2023 వల్ల జర్నలిస్టుల స్వేచ్ఛకు ఎలాంటి ముప్పు వాటిల్లదని కేంద్ర సమాచార, ప్రసార శాఖ మంత్రి అశ్విని వైష్ణవ్ బుధవారం స్పష్టం చేశారు. మీడియా స్వేచ్గా వార్తలు నివేదించే సామర్థ్యాన్ని బలహీనపరిచే నిబంధన ఏదీ ఈ చట్టంలో లేదని ఆయన హామీ ఇచ్చారు. పత్రికా స్వేచ్ఛకు ఈ చట్టం పూర్తి భద్రత కల్పిస్తుందని ఆయన పునరుద్ఘాటించారు.

డిజిటల్ న్యూస్ పబ్లిషర్స్ అసోసియేషన్ (డీఎన్‌పీఏ) ఈ చట్టాన్ని సుప్రీంకోర్టులో సవాలు చేసిన నేపథ్యంలో మంత్రి ఈ వ్యాఖ్యలు చేశారు. ఈ చట్టంలో జర్నలిజానికి ప్రత్యేక మినహాయింపులు లేకపోవడం వల్ల వార్తా సేకరణకు ఆటంకం కలుగుతుందని, ఇన్వెస్టిగేటివ్ రిపోర్టింగ్ దెబ్బతింటుందని, పౌరుల సమాచార హక్కు బలహీనపడుతుందని డీఎన్‌పీఏ తన పిటిషన్‌లో ఆందోళన వ్యక్తం చేసింది. ఈ పిటిషన్‌పై స్పందించాలని సుప్రీంకోర్టు మంగళవారం కేంద్రాన్ని ఆదేశించింది.

మీడియా సంస్థల ఆందోళనలపై స్పందించిన వైష్ణవ్, చట్టం రూపకల్పన ప్రక్రియను వివరించారు. "ప్రైవసీని ప్రాథమిక హక్కుగా గుర్తించిన సుప్రీంకోర్టు తీర్పునకు అనుగుణంగానే ఈ చట్టాన్ని రూపొందించాం. పత్రికా స్వేచ్ఛను ప్రభావితం చేయాలనే ఉద్దేశం కూడా ప్రభుత్వానికి లేదు. చట్టం రూపకల్పనకు ముందు నెల రోజుల పాటు విస్తృతమైన ప్రజా సంప్రదింపులు జరిపాం. ఇందులో పరిశ్రమ వర్గాలు కూడా పాలుపంచుకున్నాయి. చట్టంలో ఎక్కడా జర్నలిస్టుల స్వేచ్ఛకు భంగం కలిగించే అంశం లేదు" అని ఆయన తెలిపారు.

మీడియా సంస్థల ఆందోళనలను తోసిపుచ్చుతూ.. వార్తా కథనానికి సంబంధించిన వ్యక్తి నుంచి రిపోర్టర్ ముందస్తు అనుమతి తీసుకోవాలని చెప్పే నిబంధన ఏదీ ఈ చట్టంలో లేదని మంత్రి స్పష్టం చేశారు. అదేవిధంగా, కథనానికి సంబంధించిన వార్తా మూలాలను (సోర్స్) వెల్లడించాలని బలవంతం చేసే క్లాజ్ కూడా ఇందులో లేదని ఆయన క్లారిటీ ఇచ్చారు.

ఆగస్టు 2023లో పార్లమెంట్ ఆమోదించిన డీపీడీపీ చట్టం, డిజిటల్ వ్యక్తిగత డేటా రక్షణకు సంబంధించి భారతదేశంలోనే మొట్టమొదటి సమగ్ర చట్టం. వ్యక్తుల సమ్మతితో లేదా చట్టంలోని సెక్షన్ 7లో పేర్కొన్న కొన్ని 'చట్టబద్ధమైన ఉపయోగాలు' కింద వ్యక్తిగత డేటాను ప్రాసెస్ చేయడానికి ఇది అనుమతిస్తుంది. ప్రస్తుతం ఈ అంశం సుప్రీంకోర్టు పరిధిలో ఉండగా, కేంద్రం తన స్పందనను తెలియజేయాల్సి ఉంది.