హౌతీలతో కాల్పుల విరమణ ఒప్పందం.. సౌదీ అరేబియా రూ.9,500 కోట్ల‌ ఆఫర్?

పశ్చిమాసియాలో ఉద్రిక్తతల చల్లార్పు దిశగా కీలక పరిణామాలు చోటుచేసుకుంటున్నాయి. యెమెన్‌లోని హౌతీ తిరుగుబాటుదారులతో కాల్పుల విరమణ ఒప్పందం కోసం సౌదీ అరేబియా భారీ ప్రతిపాదన చేసినట్లు సంచలన కథనాలు వెలువడుతున్నాయి. 

తమ దేశంపై దాడులను నిలిపివేస్తే, హౌతీలకు 1 బిలియన్ డాలర్ల (సుమారు రూ. 9,507కోట్లు) ఆర్థిక సాయం అందిస్తామని సౌదీ ప్రతిపాదించినట్లు గల్ఫ్ దౌత్య వర్గాలను ఉటంకిస్తూ అంతర్జాతీయ మీడియా పేర్కొంది. ఈ శాంతి చర్చలకు ఇరాన్ మధ్యవర్తిత్వం వహించడం, సమావేశం టెహ్రాన్‌లో జరగడం ప్రాధాన్యం సంతరించుకుంది.

సౌదీ రక్షణ మంత్రి ప్రిన్స్ ఖలీద్ బిన్ సల్మాన్ ఇటీవలే టెహ్రాన్‌కు వెళ్లి ఈ చర్చల్లో పాల్గొన్నారు. ఈ సమావేశంలో ఇరాన్ అధ్యక్షుడు మసూద్ పెజెస్కియాన్‌తో పాటు తుర్కియే నిఘా విభాగాధిపతి ఇబ్రహీం కాలిన్, పాకిస్థాన్ ఆర్మీ చీఫ్ ఆసిమ్ మునీర్ వంటి కీలక ప్రాంతీయ నేతలు కూడా పాల్గొన్నట్లు సమాచారం. 

సౌదీ మంత్రి తన వెంట సైనిక రవాణా విమానంలో 1 బిలియన్ డాలర్ల నగదును టెహ్రాన్‌కు తీసుకొచ్చారని ఒక దౌత్యవేత్త చెప్పినప్పటికీ, సౌదీ అధికారులు మాత్రం నిధుల బదిలీని ధ్రువీకరించలేదు.

సౌదీ అరేబియాలోని విమానాశ్రయాలు, చమురు క్షేత్రాలపై హౌతీలు చేస్తున్న దాడులు, హ‌ర్మూజ్ జలసంధిలో సృష్టిస్తున్న ఆటంకాల నేపథ్యంలో శాంతిని నెలకొల్పేందుకు ఇరాన్ ఈ మధ్యవర్తిత్వానికి ముందుకొచ్చినట్లు తెలుస్తోంది. ఖతార్, పాకిస్థాన్ చేస్తున్న శాంతి ప్రయత్నాలకు మద్దతుగా, ఉద్రిక్తతలను తగ్గించేందుకే ఈ పర్యటన జరిగిందని సౌదీ విదేశాంగ శాఖ ఒక ప్రకటనలో తెలిపింది.

మూడేళ్ల క్రితం కుదిరిన ఒక అవగాహనను అమలు చేయడంలోనే ప్రధాన సమస్య ఉందని సౌదీ అధికారి ఒకరు సూచించారు. ఆ ఒప్పందం ప్రకారం.. సౌదీపై దాడులు ఆపినందుకు ప్రతిగా, హౌతీల నియంత్రణలో ఉన్న ప్రాంతాల్లో జీతాలు, మౌలిక సదుపాయాల కోసం రియాద్ ఆర్థిక సహాయం అందించాల్సి ఉంది.