భోగి'లో అనుపమ డబ్బింగ్ అద్భుతం.. 1960ల యాసలో అదరగొట్టిందన్న సంపత్ నంది!

యంగ్ హీరో శర్వానంద్ ప్రధాన పాత్రలో, దర్శకుడు సంపత్ నంది తెరకెక్కిస్తున్న భారీ యాక్షన్ డ్రామా 'భోగి'. ఈ సినిమాలో హీరోయిన్‌గా నటిస్తున్న అనుపమ పరమేశ్వరన్‌పై దర్శకుడు సంపత్ నంది ప్రశంసల వర్షం కురిపించారు. సినిమాలోని తన పాత్రకు అనుపమ సొంతంగా డబ్బింగ్ చెప్పడమే కాకుండా, అత్యంత కష్టమైన యాసను కూడా అద్భుతంగా పలికిందని కొనియాడారు.

సోమవారం, అనుపమ డబ్బింగ్ చెబుతున్న ఒక వీడియో క్లిప్‌ను సంపత్ నంది తన సోషల్ మీడియాలో పోస్ట్ చేశారు. "1960ల నాటి గ్రామీణ యాసలో డబ్బింగ్ చెప్పడం అంత సులభం కాదు. కానీ, అనుపమ చాలా సునాయాసంగా చేసి చూపించింది. కందుల సులోచన రాణి అద్భుతం" అంటూ తన పోస్ట్‌లో పేర్కొన్నారు. శ్రీ సత్యసాయి ఆర్ట్స్ పతాకంపై నిర్మిస్తున్న ఈ చిత్రాన్ని నవంబర్ 12న విడుదల చేయనున్నట్లు కూడా ఆయన స్పష్టం చేశారు.

'భోగి' చిత్రంలో అనుపమ 'కందుల సులోచన రాణి' అనే ఒక విభిన్నమైన పాత్రలో కనిపించనుంది. ఇప్పటికే విడుదలైన ఆమె క్యారెక్టర్ పోస్టర్ ప్రేక్షకులను ఆకట్టుకుంది. గ్రామీణ యువతిగా, కాళ్లకు చెప్పులు లేకుండా మట్టి దారిలో నడుస్తూ, తలపై మోదుగ ఆకులతో నిండిన బుట్టతో కనిపించిన ఆమె లుక్ పాత్రపై ఆసక్తిని పెంచింది. ఈ చిత్రంలో ఆమె ప్రకృతితో మమేకమై జీవించే, మోదుగ ఆకులతో విస్తరాకులు కుట్టి జీవనం సాగించే మహిళగా కనిపించనుందని సమాచారం.

1960ల నేపథ్యంలో తెలంగాణ, మహారాష్ట్ర సరిహద్దుల్లోని ఓ కల్పిత గ్రామంలో జరిగే పీరియడ్ యాక్షన్ డ్రామాగా 'భోగి' రూపుదిద్దుకుంటోంది. ఈ సినిమాలో శర్వానంద్ 'గంగ' అనే పవర్‌ఫుల్ పాత్రలో నటిస్తుండగా, డింపుల్ హయతి మరో కీలక పాత్ర పోషిస్తున్నారు. కిరణ్ కుమార్ మన్నె ప్రొడక్షన్ డిజైనర్‌గా, కిశోర్ కుమార్ అరోకియా సినిమాటోగ్రాఫర్‌గా, భీమ్స్ సిసిరోలియో సంగీత దర్శకుడిగా పనిచేస్తున్నారు. ఈ చిత్రాన్ని తెలుగుతో పాటు తమిళం, కన్నడ, మలయాళం, హిందీ భాషల్లో నవంబర్ 12న పాన్-ఇండియా స్థాయిలో విడుదల చేయడానికి సన్నాహాలు చేస్తున్నారు.