నా మాటల్లో సగమే విన్నారు: ఖర్గే వ్యాఖ్యల దుమారంపై సభికుడి వివరణ

ప్రధాని మోదీని ఉద్దేశించి కాంగ్రెస్ అధ్యక్షుడు మల్లికార్జున ఖర్గే చేసిన ‘మోదీ కా బాప్ భీ జాయేగా’ వ్యాఖ్యల వెనుక అసలు కథ వేరే ఉందని తేలింది. ఖర్గే ప్రసంగానికి అడ్డుతగిలిన వ్యక్తి.. తన మాటలను పూర్తిగా వినకుండా అపార్థం చేసుకోవడం వల్లే ఈ వివాదం చెలరేగిందని స్పష్టం చేశారు. ‘తిరుగుబాటు జరిగితే తప్ప మోదీ వెళ్లరు’ అని తాను అన్నానని, కానీ అందులో ‘మోదీ వెళ్లరు’ అనే భాగం మాత్రమే విని కాంగ్రెస్ నేతలు, కార్యకర్తలు రెచ్చిపోయి తనపై దాడి చేశారని ఆయన వివరించారు. ఈ కొత్త కోణంతో ఖర్గే వ్యాఖ్యల వివాదం ఒక్కసారిగా మరో మలుపు తిరిగింది.

అసలేం జరిగింది?
బిహార్ తొలి ముఖ్యమంత్రి శ్రీకృష్ణ సింగ్ 139వ జయంతి సందర్భంగా పట్నాలోని బాపు సభాగర్‌లో ఆదివారం కాంగ్రెస్ ఓ కార్యక్రమం ఏర్పాటు చేసింది. ఈ సభలో మల్లికార్జున ఖర్గే ప్రసంగిస్తూ.. కేంద్ర ప్రభుత్వంపై, ఆరెస్సెస్‌పై విమర్శలు గుప్పించారు. ఓట్ల జాబితాలో అవకతవకలు జరుగుతున్నాయని ఆరోపించారు. ఈ సమయంలో సభలో ఉన్న సంతోష్ కుమార్ అనే వ్యక్తి లేచి నిలబడి ‘తిరుగుబాటు జరిగితే తప్ప మోదీ వెళ్లరు’ అని గట్టిగా అరిచారు.

అయితే, వేదికపై ఉన్న ఖర్గే, ఇతర నేతలు ఆయన మాటల్లోని ‘తిరుగుబాటు’ అనే పదాన్ని విస్మరించి, కేవలం ‘మోదీ వెళ్లరు’ అన్న మాటలనే పరిగణనలోకి తీసుకున్నారు. దీంతో ఆగ్రహానికి గురైన ఖర్గే.. "కౌన్ హై వో? (ఎవరతను?)" అంటూ.. "అరే, జాయేగా.. మోదీ కా బాప్ భీ జాయేగా (అరే, వెళ్తాడు.. మోదీ తండ్రి కూడా వెళ్లాల్సిందే)" అని రెండుసార్లు పునరుద్ఘాటించారు. ఖర్గే వ్యాఖ్యలతో సభలోని కాంగ్రెస్ కార్యకర్తలు రెచ్చిపోయి, సంతోష్ కుమార్‌ను చుట్టుముట్టి, కిందపడేసి చితకబాది బయటకు గెంటేశారు.

నా ఉద్దేశం కూడా మోదీ వెళ్లాలనే: సంతోష్ కుమార్
దాడి అనంతరం బయటకు వచ్చిన సంతోష్ కుమార్ మీడియాతో మాట్లాడుతూ జరిగినదంతా వివరించారు. "నా మాటల్లో కొంత భాగమే విని తప్పుగా అర్థం చేసుకున్నారు. దేశంలో మార్పు రావాలని, తిరుగుబాటు ద్వారా మోదీ అధికారం నుంచి దిగిపోవాలని చెప్పడమే నా ఉద్దేశం. అందుకే ‘తిరుగుబాటు వస్తే తప్ప మోదీ వెళ్లరు’ అన్నాను. నిజానికి నేను కూడా మోదీ వెళ్లాలనే కోరుకుంటున్నాను. కానీ, నా మాటలను వక్రీకరించి నాపై దాడి చేశారు" అని ఆయన ఆవేదన వ్యక్తం చేశారు.

భగ్గుమన్న బీజేపీ.. సమర్థించిన కాంగ్రెస్
సభికుడి వివరణ ఎలా ఉన్నప్పటికీ, ఖర్గే వ్యాఖ్యలపై బీజేపీ తీవ్రస్థాయిలో భగ్గుమంది. కేంద్ర హోంమంత్రి అమిత్ షా స్పందిస్తూ.. కాంగ్రెస్ అన్ని హద్దులు మీరుతోందని, గతంలో ప్రధాని తల్లిని, ఆయనను నీచంగా దూషించిన చరిత్ర వారిదని మండిపడ్డారు. బీజేపీ అధ్యక్షుడు నితిన్ నబిన్‌తో పాటు పలువురు నేతలు కూడా ఖర్గే వ్యాఖ్యలను ఖండించారు. బిహార్ ముఖ్యమంత్రి సమ్రాట్ చౌదరి మాట్లాడుతూ.. ఖర్గే వ్యాఖ్యలు దురదృష్టకరమని,  ఖర్గేతో పాటు రాహుల్ గాంధీ కూడా క్షమాపణ చెప్పాలని డిమాండ్ చేశారు. రాజకీయ విభేదాలు కుటుంబ సభ్యులపై వ్యక్తిగత దాడులకు దారితీయకూడదని ఆయన హితవు పలికారు. ఖర్గే బేషరతుగా క్షమాపణ చెప్పాలని బిహార్ బీజేపీ నేతలు డిమాండ్ చేస్తూ, ఆయన దిష్టిబొమ్మను దహనం చేశారు. మరోవైపు, కాంగ్రెస్ నేతలు మాత్రం ఖర్గే వ్యాఖ్యలను సమర్థించుకున్నారు. బీజేపీ కార్యకర్త కావాలనే సభకు అడ్డుతగిలాడని, ‘బాప్ భీ జాయేగా’ అనేది ఒక జాతీయం మాత్రమేనని కాంగ్రెస్ ప్రతినిధి సురేంద్ర రాజ్‌పుత్ వాదించారు. 

పట్నా పోలీస్ స్టేషన్‌లో ఫిర్యాదు
ఖర్గే వ్యాఖ్యలను టీవీ వార్తల్లో చూసి తీవ్ర మనస్తాపానికి గురయ్యానని పేర్కొంటూ బీజేపీ రాష్ట్ర కార్యవర్గ సభ్యుడు కృష్ణ కుమార్, పట్నాలోని కొత్వాలీ పోలీస్ స్టేషన్‌లో ఖర్గేపై ఫిర్యాదు చేశారు. బహిరంగ వేదికపై ఒక వ్యక్తి కుటుంబాన్ని కించపరిచేలా మాట్లాడటం సరికాదని, ప్రజా జీవితంలో హుందాతనం పాటించాలని ఆయన తన ఫిర్యాదులో పేర్కొన్నారు. ఈ ఘటనకు సంబంధించిన వార్తా కథనాలు, వీడియో ఫుటేజీలను పరిశీలించి, చట్టపరమైన చర్యలు తీసుకోవాలని పోలీసులను కోరారు.