రాహుల్ విదేశీ పర్యటనలు దేశ ప్రతిష్ఠను దెబ్బతీసేందుకే: రాహుల్ పై పీవీ మనవడు ఎన్వీ సుభాష్ విమర్శలు

కాంగ్రెస్ అగ్రనేత, లోక్‌సభ ప్రతిపక్ష నాయకుడు రాహుల్ గాంధీపై బీజేపీ తీవ్ర స్థాయిలో విరుచుకుపడింది. తన విదేశీ పర్యటనల ద్వారా భారతదేశంలోని రాజ్యాంగబద్ధ సంస్థలను బలహీనపరిచేందుకు రాహుల్ ప్రయత్నిస్తున్నారని బీజేపీ అధికార ప్రతినిధి, మాజీ ప్రధాని స్వర్గీయ పీవీ నరసింహారావు మనవడు ఎన్వీ సుభాష్ ఆరోపించారు. నేడు ఆయన మాట్లాడుతూ.. పలు రాష్ట్రాల అసెంబ్లీ ఎన్నికలు సమీపిస్తున్న తరుణంలో దేశ ప్రతిష్ఠను దెబ్బతీయడానికి ఒక పద్ధతి ప్రకారం ప్రయత్నాలు జరుగుతున్నాయని విమర్శించారు.

"రాహుల్ గాంధీ విదేశాలకు వెళ్లినప్పుడల్లా, ఆయన చుట్టూ ఉన్న ఎకోసిస్టమ్‌లో ఏదో మార్పు వస్తుంది. ప్రతిపక్ష నేతగా ఆయన నరేంద్ర మోదీ ప్రభుత్వాన్ని విమర్శించవచ్చు, కానీ దానికి బదులుగా రాజ్యాంగం, ఎన్నికల సంఘం, న్యాయవ్యవస్థ వంటి వ్యవస్థలను లక్ష్యంగా చేసుకుంటున్నారు. ఏదో ఒకరోజు వారు మీడియాపై కూడా వ్యాఖ్యలు చేస్తారు. ఆయన విదేశాలకు వెళ్లి ఇక్కడి ప్రజలను ఇబ్బందులకు గురిచేస్తున్నారు" అని సుభాష్ అన్నారు.

బాధ్యతాయుతమైన ప్రతిపక్ష నేత దేశంలోనే ఉండి, పార్టీ కార్యకర్తలతో, ప్రజలతో మమేకం కావాలని ఆయన సూచించారు. "విదేశాల నుంచి తిరిగి వచ్చాక, ఏమాత్రం సంబంధం లేని విషయాలు మాట్లాడుతూ కొన్ని వర్గాల ప్రజలను రెచ్చగొడుతున్నారు. రాబోయే ఐదు రాష్ట్రాల అసెంబ్లీ ఎన్నికల ఫలితాలతో ఆయన ఓటముల సెంచరీ కొట్టడం ఖాయం" అని ఎద్దేవా చేశారు.

రాజకీయ మనుగడ కోసం రాహుల్ గాంధీ మతపరమైన, సామాజికపరమైన సున్నితమైన అంశాలను రెచ్చగొడుతున్నారని, ఇది ఆందోళన కలిగించే విషయమని సుభాష్ పేర్కొన్నారు. రాబోయే ఎన్నికల్లో కాంగ్రెస్ ఘోర పరాజయం ఖాయమని తెలిసే, ఓటమికి సాకులు సిద్ధం చేసుకుంటున్నారని ఆరోపించారు. "ఎన్నికల్లో ఓటమి తర్వాత ఈవీఎంల వలనో, ఇతర కారణాల వలనో ఓడిపోయామని చెప్పడానికి ఆయన ఇప్పటినుంచే పునాదులు వేస్తున్నారు" అని విమర్శించారు.

గతంలో కాంగ్రెస్ పార్టీలో పనిచేసిన గొప్ప ప్రతిపక్ష నేతల మాదిరిగా రాహుల్ గాంధీ బాధ్యతాయుతంగా వ్యవహరించాలని సుభాష్ డిమాండ్ చేశారు. "రాహుల్ గాంధీ బాధ్యతాయుతమైన ప్రతిపక్ష నేతగా మెలగాలని బీజేపీ డిమాండ్ చేస్తోంది. ఆయన పూర్వీకులు ఈ దేశాన్ని పాలించారు. కానీ వారెవరూ ఇలా ప్రవర్తించలేదు" అని సుభాష్ వ్యాఖ్యానించారు.