టీమిండియా చేతిలో వరుసగా రెండు ఓటములపై న్యూజిలాండ్ కోచ్ ఏమన్నాడంటే..!

టీమిండియాతో జరిగిన రెండు టీ20 మ్యాచ్‌లలో తమ జట్టు ఓటమిపాలవడంపై న్యూజిలాండ్ హెడ్ కోచ్ రాబ్ వాల్టర్ స్పందించాడు. రెండు మ్యాచ్‌లలోనూ తమ జట్టు 80 శాతం వరకు అద్భుతంగా ఆడిందని, కానీ కీలక సమయాల్లో ఆటను ముగించడంలో విఫలమవ్వడమే పరాజయాలకు కారణమని విశ్లేషించాడు. క్రైస్ట్‌చర్చ్‌లోని హేగ్లీ ఓవల్ వేదికగా జరిగిన రెండు మ్యాచ్‌లలోనూ న్యూజిలాండ్ 4 వికెట్ల తేడాతో ఓటమి చవిచూసిన విషయం తెలిసిందే.

ఈ పరాజయాలపై న్యూజిలాండ్ క్రికెట్ (NZC) విడుదల చేసిన వీడియోలో వాల్టర్ మాట్లాడుతూ, "టీ20 క్రికెట్‌లో గెలుపోటముల మధ్య తేడా చాలా స్వల్పంగా ఉంటుంది. రెండు మ్యాచ్‌లలోనూ మేము సులభంగా గెలవాల్సిన స్థితిలో ఉన్నాం. కానీ, ఆటను మా వైపు తిప్పుకోగల కొన్ని అవకాశాలను చేజార్చుకున్నాం. ఇది తీవ్ర నిరాశకు గురిచేసింది. అయితే, సిరీస్‌కు ముందు పెద్దగా పోటీ క్రికెట్ ఆడని మా జట్టు ప్రదర్శన పట్ల చాలా సంతోషంగా ఉన్నాను. మేము ఫినిషంగ్ టచ్ ఇవ్వలేకపోయాం, కానీ రెండు మ్యాచ్‌ల నుంచి నేర్చుకోవాల్సింది చాలా ఉంది" అని తెలిపాడు.

మ్యాచ్ ఫలితాన్ని ప్రభావితం చేసిన అంశాలను వాల్టర్ ప్రత్యేకంగా ప్రస్తావించాడు. "ఫీల్డింగ్‌లో కొన్ని క్యాచ్‌లు జారవిడవడం, నోబాల్‌కు వికెట్ కోల్పోవడం వంటి చిన్న చిన్న తప్పిదాలే మ్యాచ్ ఫలితాన్ని తారుమారు చేశాయి. ఎవరూ ఉద్దేశపూర్వకంగా తప్పులు చేయరు, కానీ అవి ఆటలో భాగం. అవి మా ఓటమికి కారణమయ్యాయి. అయితే, భారత్ వైపు నుంచి కూడా ఇలాంటి పొరపాట్లు జరిగాయి, అవి వారి ఆటను కూడా ప్రభావితం చేసి ఉండొచ్చు" అని విశ్లేషించాడు.

జట్టు ప్రదర్శనలోని సానుకూల అంశాలను కూడా వాల్టర్ ప్రశంసించాడు. "మా బ్యాటింగ్ యూనిట్‌లోని పలువురు ఆటగాళ్లు అద్భుతంగా రాణించారు. ముఖ్యంగా రెండో మ్యాచ్‌లో పవర్‌ప్లేలోనే మూడు వికెట్లు కోల్పోయి కష్టాల్లో పడినప్పటికీ, 180 పరుగుల స్కోరు చేయడం గొప్ప విషయం. బెవాన్, గ్లెన్ ఫిలిప్స్ అద్భుతంగా రాణించి జట్టుకు కాపాడదగిన స్కోరు అందించారు. బౌలింగ్ విభాగంలో కూడా తొలి మ్యాచ్ కంటే రెండో మ్యాచ్‌లో మెరుగయ్యాం. ఫీల్డింగ్ తీవ్రతను, ఆటగాళ్ల శ్రమను ప్రశ్నించలేం" అని అన్నాడు.

మంగళవారం వెల్లింగ్‌టన్‌లో జరగనున్న మూడో టీ20 గురించి మాట్లాడుతూ, అక్కడి పరిస్థితులు భిన్నంగా ఉంటాయని అంచనా వేశాడు. "అది సంప్రదాయ క్రికెట్ గ్రౌండ్ కాదు. స్టేడియంలో గాలి దిశను అంచనా వేయడం కష్టం. ఇది డ్రాప్-ఇన్ పిచ్ కావడంతో దాని స్వభావం కూడా భిన్నంగా ఉండొచ్చు. ఈ కొత్త సవాళ్లకు మా జట్టు ఎలా స్పందిస్తుందనేది ఆసక్తికరంగా ఉంటుంది. పరిస్థితులకు తగ్గట్టుగా రాణిస్తే విజయం సాధిస్తామనే నమ్మకం ఉంది" అని ధీమా వ్యక్తం చేశాడు.