ఏపీకి ‘అర్ణబ్’ తుపాను ముప్పు.. యంత్రాంగం ఐదు రోజులు అప్రమత్తంగా ఉండాలి: మంత్రి అనిత

ఏపీకి ‘అర్ణబ్’ తుపాను ముప్పు పొంచి ఉన్నందున రాష్ట్ర యంత్రాంగం రాబోయే ఐదు రోజుల పాటు పూర్తి అప్రమత్తంగా ఉండాలని హోంమంత్రి వంగలపూడి అనిత ఆదేశించారు. రేప‌టి నుంచి కోస్తాంధ్ర జిల్లాల్లో భారీ నుంచి అతి భారీ వర్షాలు కురిసే అవకాశం ఉందని, ప్రజలు, అధికారులు తగిన జాగ్రత్తలు తీసుకోవాలని ఆమె సూచించారు.

అమరావతిలో మాట్లాడిన మంత్రి అనిత.. తుపాను తీరుతెన్నులను వివరించారు. ఈ తుపాను బుధవారం బాపట్ల-విశాఖపట్నం మధ్య తీరం దాటే అవకాశం ఉందని, ఆ సమయంలో గంటకు 115 నుంచి 125 కిలోమీటర్ల వేగంతో బలమైన ఈదురు గాలులు వీస్తాయని తెలిపారు. మంగళ, బుధవారాల్లో వర్షాల తీవ్రత అధికంగా ఉంటుందని పేర్కొన్నారు.

తుపాను ప్రభావిత జిల్లాల కలెక్టర్లు, ఎస్పీలు, క్షేత్రస్థాయి అధికారులు అప్రమత్తంగా ఉండాలని మంత్రి ఆదేశించారు. ప్రమాదకరమైన హోర్డింగులను వెంటనే తొలగించాలని, తీరప్రాంత ప్రజలను అవసరమైతే సురక్షిత ప్రాంతాలకు తరలించేందుకు సిద్ధంగా ఉండాలని సూచించారు. ఎన్డీఆర్ఎఫ్, ఎస్డీఆర్ఎఫ్ బృందాలను సిద్ధంగా ఉంచాలని చెప్పారు. మత్స్యకారులు సముద్రంలోకి వేటకు వెళ్లరాదని, పర్యాటకులను బీచ్‌లకు అనుమతించవద్దని స్పష్టం చేశారు.

రైతులు, సాధారణ ప్రజలు తగిన జాగ్రత్తలు తీసుకోవాలని హోంమంత్రి విజ్ఞప్తి చేశారు. సముద్రపు అలల వద్ద సెల్ఫీలు వంటి సాహసాలు చేయవద్దని హెచ్చరించారు. సామాజిక మాధ్యమాల్లో వచ్చే వదంతులను నమ్మవద్దని, కేవలం విపత్తుల నిర్వహణ సంస్థ జారీచేసే అధికారిక సమాచారాన్ని మాత్రమే విశ్వసించాలని కోరారు.