ఏఆర్ రెహమాన్ స్వరాల్లో 'రంగులు రంగేళీ'.. ఆకట్టుకుంటున్న 'రామాయ‌ణ' మెలోడీ

బాలీవుడ్ స్టార్ రణ్‌బీర్ కపూర్, సాయి పల్లవి ప్రధాన పాత్రల్లో నటిస్తున్న ప్రెస్టీజియస్ చిత్రం 'రామాయణ' నుంచి మేకర్స్ మరో కీలక అప్‌డేట్ ఇచ్చారు. ఈ సినిమా నుంచి 'రంగులు రంగేళీ' అనే మూడో సింగిల్‌ను తాజాగా విడుదల చేశారు. నితీశ్ తివారీ దర్శకత్వంలో రెండు భాగాలుగా తెరకెక్కుతున్న ఈ చిత్రంలో రణ్‌బీర్ శ్రీరాముడిగా, సాయి పల్లవి సీతగా నటిస్తున్నారు.

ఈ కొత్త పాటకు ఏఆర్ రెహమాన్ స్వరాలు సమకూర్చగా, రాకేందు మౌళి సాహిత్యం అందించారు. రాఘవ్ కౌశిక్, వైశాలి సమంత్ ఈ మెలోడీని ఆలపించారు. భారతీయ, ఆధునిక సంగీతాల కలయికతో ఈ పాట శ్రావ్యంగా ఉందని ప్రేక్షకుల నుంచి మంచి స్పందన వస్తోంది.

రామసీతల మధ్య ఉన్న పవిత్ర బంధాన్ని, వారి ప్రయాణాన్ని ఈ పాటలో అందంగా చిత్రీకరించారు. స్వయంవరం, వివాహం, అయోధ్యలోని జీవితం, అరణ్యవాసం వంటి కీలక ఘట్టాలను ఈ పాట విజువల్స్‌లో చూపించారు.

నవంబర్ 5న ఈ సినిమా మొదటి భాగం ప్రపంచవ్యాప్తంగా థియేటర్లలో విడుదల కానుంది. దీపావళి సీజన్‌ను టార్గెట్ చేస్తూ వస్తున్న ఈ సినిమాపై భారీ అంచనాలు నెలకొని ఉండగా, తాజా పాట విడుదలతో ప్రమోషన్లను మరింత వేగవంతం చేశారు చిత్రబృందం.