కొత్త జీవితం ప్రారంభించేలోపే విషాదం.. అమెరికాలో తెలంగాణ యువతి హఠాన్మరణం

అమెరికాలో ఉన్నత చదువులు పూర్తి చేసి, ఉద్యోగంలో చేరి జీవితంలో స్థిరపడాలనుకున్న తెలంగాణ యువతి కలలు కల్లలయ్యాయి. ఖమ్మం జిల్లాకు చెందిన అక్షిత (25) న్యూయార్క్‌లోని అల్బనీలో శుక్రవారం గుండెపోటుతో హఠాన్మరణం చెందారు. జీవితంలో కొత్త అధ్యాయం ప్రారంభించాల్సిన తరుణంలో ఆమె మరణవార్త కుటుంబ సభ్యులను తీవ్ర విషాదంలోకి నెట్టింది.

ఖమ్మంకు చెందిన వ్యాపారవేత్త నల్లమల ఆనంద్ కుమార్తె అయిన అక్షిత, ఉన్నత విద్య కోసం అమెరికా వెళ్లారు. ఇటీవలే ఆమె తన మాస్టర్ ఆఫ్ సైన్స్ (ఎంఎస్) డిగ్రీని పూర్తి చేశారు. ఓ మంచి కంపెనీలో ఉద్యోగం కూడా సంపాదించారు. కుటుంబ సభ్యుల కథనం ప్రకారం శుక్రవారం రాత్రి భోజనం అనంతరం తన నివాసం బయట నడుస్తుండగా ఆమె ఒక్కసారిగా కుప్పకూలిపోయారు.

కొంతసేపటికి బయటకు వచ్చిన ఆమె సోదరుడు అక్షయ్, అక్షిత అపస్మారక స్థితిలో పడి ఉండటాన్ని గమనించారు. వెంటనే స్థానికుల సహాయంతో సమీపంలోని ఆసుపత్రికి తరలించారు. అయితే, అప్పటికే ఆమె మృతి చెందినట్లు వైద్యులు నిర్ధారించారు.

ఉద్యోగంలో చేరేందుకు సిద్ధమవుతున్న సమయంలో అక్షిత ఆకస్మికంగా మరణించడంతో ఆమె కుటుంబం శోకసంద్రంలో మునిగిపోయింది. అక్షిత మృతదేహాన్ని అంత్యక్రియల నిమిత్తం భారత్‌కు తీసుకువచ్చేందుకు కుటుంబ సభ్యులు ఏర్పాట్లు చేస్తున్నారు.