ఇప్పుడు వాళ్ల టైమ్.. ఓపిక పడదాం.. మన టైమ్ వస్తుంది: జగన్

స్థానిక సంస్థల ఎన్నికల నామినేషన్ల ప్రక్రియలో అధికార పక్షం దౌర్జన్యాలకు పాల్పడుతోందని, అయితే ఈ ఇబ్బందులు తాత్కాలికమేనని వైసీపీ అధినేత జగన్ పార్టీ శ్రేణులకు ధైర్యం చెప్పారు. "ఇప్పుడు వాళ్ల సమయం నడుస్తోంది.. మనం కాస్త ఓపిక పడదాం.. మన సమయం మళ్లీ వస్తుంది" అని ఆయన వ్యాఖ్యానించారు.

పులివెందుల, పుంగనూరు, కడప, రాయచోటి, గుంతకల్, దర్శి సహా పలు ప్రాంతాల్లో టీడీపీ కార్యకర్తలు, పోలీసులు కలిసి వైసీపీ అభ్యర్థులను నామినేషన్లు వేయకుండా అడ్డుకుంటున్నారని జగన్ తీవ్రంగా ఆరోపించారు. నామినేషన్ పత్రాలను చించివేయడం, అభ్యర్థులను బెదిరించడం, కొందరిని కిడ్నాప్ చేయడం వంటి ఘటనలు జరుగుతున్నాయని ఆయన అన్నారు. ఈ అక్రమాలపై ఆధారాలతో సహా తాను గవర్నర్‌ను, రాష్ట్ర ఎన్నికల కమిషనర్‌ను స్వయంగా కలిసి ఫిర్యాదు చేసినా క్షేత్రస్థాయిలో పరిస్థితిలో ఏమాత్రం మార్పు రాలేదని ఆవేదన వ్యక్తం చేశారు.

కొందరు సీనియర్ పోలీస్ అధికారులు అధికార పార్టీ నేతలకు కొమ్ముకాస్తున్నారని, స్వేచ్ఛగా, నిష్పక్షపాతంగా నామినేషన్ల ప్రక్రియను నిర్వహించడంలో రాష్ట్ర ఎన్నికల సంఘం విఫలమైందని జగన్ విమర్శించారు. అధికార పక్షం ఎన్ని దౌర్జన్యాలకు పాల్పడినా వెనక్కి తగ్గకుండా నామినేషన్లు వేయాలని ఆయన పార్టీ కార్యకర్తలకు పిలుపునిచ్చారు.