నీటి కుంటలో కూనల కేరింతలు.. పహారా కాస్తున్న తల్లి పులి.. వీడియో చూస్తే ఫిదా అవ్వాల్సిందే!

మహారాష్ట్రలోని ప్రసిద్ధ తడోబా-అంధారి టైగర్ రిజర్వ్‌లో ఓ అరుదైన, అందమైన దృశ్యం కెమెరాకు చిక్కింది. ఓ తల్లి పులి తన పిల్లలు నీటిలో ఆడుకుంటూ సేదతీరుతుండగా, వాటికి దగ్గరలోనే కూర్చుని పహారా కాస్తున్న వీడియో ఒకటి సోషల్ మీడియాలో వైరల్‌ అవుతోంది.

ఈ వీడియోలో దాదాపు నాలుగైదు పులి కూనలు ఓ బురద నీటి కుంటలో కేరింతలు కొడుతూ కనిపించాయి. కొన్ని నీటిలో మునుగుతూ, మరికొన్ని సరదాగా ఆడుకుంటూ ఎండ వేడి నుంచి ఉపశమనం పొందుతున్నాయి. వాటికి కొద్ది దూరంలోనే ఒడ్డున కూర్చున్న తల్లి పులి, ఎలాంటి అపాయం రాకుండా కంటికి రెప్పలా వాటిని కనిపెట్టుకుని ఉంది. మధ్యలో ఒకసారి అది నీటి వైపు వంగి, పిల్లలను పరిశీలించి మళ్లీ తన పర్యవేక్షణను కొనసాగించింది.

ఈ అద్భుతమైన దృశ్యాన్ని తొలుత అదే రిజర్వ్‌లో పనిచేసే రాహుల్ మంగం ఇన్‌స్టాగ్రామ్‌లో పంచుకున్నారు. ఆ తర్వాత, రిటైర్డ్ ఇండియన్ ఫారెస్ట్ సర్వీస్ అధికారి సుశాంత నంద ఈ క్లిప్‌ను 'ఎక్స్‌'లో షేర్ చేశారు. "తల్లి పర్యవేక్షణలో నేను చూసిన అత్యుత్తమ పూల్ పార్టీ ఇదే" అని ఆయన దీనికి వ్యాఖ్యానించారు. ఈ వీడియో చూసిన నెటిజన్లు ఆనందం వ్యక్తం చేస్తూ, అడవిలో ఇలాంటి అరుదైన కుటుంబ క్షణాలను చూసి మురిసిపోతున్నారు.