ఏపీ సర్కార్ కీలక నిర్ణయం.. సాక్షిపై కేసు నమోదుకు చర్యలు

'సాక్షి' దినపత్రికపై న్యాయపరమైన చర్యలు తీసుకునేందుకు ఆంధ్రప్రదేశ్ ప్రభుత్వం అనుమతినిచ్చింది. ఎన్టీఆర్ జిల్లా పోలీస్ కమిషనర్ ఎస్.వి. రాజశేఖర్ బాబును లక్ష్యంగా చేసుకుని ‘బెజవాడ బాస్ బిగ్ డీల్!’ అనే శీర్షికతో ప్రచురితమైన కథనంపై ప్రభుత్వం ఈ నిర్ణయం తీసుకుంది. ఈ నేపథ్యంలో సదరు పత్రిక ప్రచురణకర్త, రెసిడెంట్ ఎడిటర్, రిపోర్టర్‌తో పాటు ఆ కథనానికి బాధ్యులైన ఇతరులపై కోర్టులో ఫిర్యాదు చేసేందుకు ప్రభుత్వం ఆమోదం తెలిపింది.

వివరాల్లోకి వెళితే.. గత జూన్ 30న ప్రచురితమైన ఈ కథనంలో, అద్విక ట్రేడింగ్ కంపెనీ డిపాజిట్ మోసం కేసు విచారణను కమిషనర్ ప్రభావితం చేశారని, నిందితులతో అక్రమంగా సెటిల్‌మెంట్ చేసుకుని లంచం తీసుకున్నారని, తన అధికారాన్ని దుర్వినియోగం చేశారని సాక్షి పత్రిక ఆరోపించింది. అయితే, ఈ ఆరోపణలు పూర్తిగా నిరాధారమైనవని ప్రభుత్వం స్పష్టం చేసింది.

ఈ వ్యవహారంపై పోలీస్ కమిషనర్ సమర్పించిన లేఖను, డీజీపీ ఇచ్చిన నివేదికను ప్రభుత్వం క్షుణ్ణంగా పరిశీలించింది. అనంతరం, బీఎన్ఎస్-2023లోని సెక్షన్ 222(2), 222(4)తో పాటు ఆల్ ఇండియా సర్వీసెస్ (కాండక్ట్) రూల్స్, 1968లోని రూల్ 17 ప్రకారం ప్రాసిక్యూషన్ చర్యలకు అనుమతి ఇచ్చింది. ఈ మేరకు తదుపరి చర్యలు తీసుకోవాల్సిందిగా ప్రాసిక్యూషన్ డైరెక్టర్‌ను, ఎన్టీఆర్ జిల్లా పోలీస్ కమిషనర్‌ను ప్రభుత్వం ఆదేశించింది.