కామన్వెల్త్ క్రీడలు: జూడోలో భారత్ గోల్డెన్ డబుల్.. అస్మిత, హర్ష్‌లకు స్వర్ణాలు

కామన్వెల్త్ క్రీడలు 2026లో భారత జూడోకాలు అద్భుత ప్రదర్శనతో అదరగొట్టారు. జూడోలో భారత్‌కు గోల్డెన్ డబుల్ అందించి దేశ కీర్తి పతాకాన్ని రెపరెపలాడించారు. మహిళల 48 కేజీల విభాగంలో అస్మితా దే, పురుషుల 60 కేజీల విభాగంలో హర్ష్ సింగ్ స్వర్ణ పతకాలను కైవసం చేసుకుని పోడియంపై నిలిచారు. గంట వ్యవధిలో ఒకరి తర్వాత ఒకరు సాధించిన ఈ విజయాలతో గ్లాస్గోలో భారత శిబిరంలో సంబరాలు అంబరాన్నంటాయి.

మహిళల 48 కేజీల విభాగంలో గురువారం జరిగిన ఫైనల్స్‌లో అస్మితా దే అద్వితీయమైన పోరాట పటిమను ప్రదర్శించింది. కెనడాకు చెందిన అనుభవజ్ఞురాలైన హీదీ క్వాచ్‌తో జరిగిన హోరాహోరీ పోరులో అస్మిత 2-1 తేడాతో విజయం సాధించింది. మ్యాచ్ ఆద్యంతం వ్యూహాత్మకంగా ఆడిన అస్మిత, కీలక సమయాల్లో సంయమనం పాటిస్తూ పాయింట్లు సాధించి కెరీర్‌లోనే అతిపెద్ద విజయాన్ని నమోదు చేసింది. టోర్నమెంట్ మొదటి నుంచి నిలకడైన ప్రదర్శనతో ఫైనల్ చేరిన ఆమె, తుది పోరులోనూ అదే జోరును కొనసాగించి బంగారు పతకాన్ని ముద్దాడింది.

అస్మిత స్ఫూర్తితో బరిలోకి దిగిన భారత యువ జూడోకా హర్ష్ సింగ్ కూడా సత్తా చాటాడు. పురుషుల 60 కేజీల విభాగంలో జరిగిన ఫైనల్‌లో అతను పూర్తి ఆధిపత్యం ప్రదర్శించాడు. ఆస్ట్రేలియాకు చెందిన జోషువా కాట్జ్‌తో జరిగిన టైటిల్ పోరును ఏకపక్షంగా మార్చేశాడు. ప్రత్యర్థికి ఒక్క పాయింట్ కూడా సాధించే అవకాశం ఇవ్వకుండా, 10-0 తేడాతో చిత్తు చేసి స్వర్ణ పతకాన్ని గెలుచుకున్నాడు. హర్ష్ వేగం, కచ్చితమైన ఎత్తుగడల ముందు ఆస్ట్రేలియా జూడోకా నిలవలేకపోయాడు.

ఈ రెండు స్వర్ణాలతో కామన్వెల్త్ క్రీడల్లో భారత్ మొత్తం పతకాల సంఖ్య 19కి చేరింది. ఇందులో 5 స్వర్ణాలు, 10 రజతాలు, 4 కాంస్య పతకాలు ఉన్నాయి. జాతీయ, అంతర్జాతీయ స్థాయిలో ఇప్పటికే పలు టోర్నీలలో సత్తా చాటిన హర్ష్ సింగ్, అస్మితా దే‌ల విజయాలు దేశంలో జూడో క్రీడకు మరింత ప్రోత్సాహాన్ని ఇస్తాయని క్రీడా విశ్లేషకులు భావిస్తున్నారు. ఈ విజయాలు భవిష్యత్ తరాలకు స్ఫూర్తినిస్తాయని ఆశాభావం వ్యక్తం చేస్తున్నారు.