దాదర్ స్టేషన్‌లో 'హ్యూమన్ ఇండికేటర్'.. ప్రయాణికులకు ఓ వ్యక్తి నిస్వార్థ సేవ

లక్షలాది మంది ప్రయాణికులతో నిత్యం రద్దీగా ఉండే ముంబైలోని దాదర్ రైల్వే స్టేషన్‌లో ఓ వ్యక్తి తన నిస్వార్థ సేవలతో అందరి మన్ననలు పొందుతున్నారు. వర్లీ నివాసి అయిన నరేంద్ర పాటిల్, ప్రతిరోజూ ఉదయం రెండు గంటల పాటు స్టేషన్‌లోని వెస్టర్న్ లైన్ బ్రిడ్జిపై ఉండి, గందరగోళానికి గురయ్యే ప్రయాణికులకు రైళ్లు, ప్లాట్‌ఫామ్‌ల వివరాలను తెలియజేస్తూ మార్గదర్శనం చేస్తున్నారు. ఆయన అందిస్తున్న విశిష్ట సేవలకు ముగ్ధులైన ప్రయాణికులు ఆయన్ను ఆత్మీయంగా 'హ్యూమన్ ఇండికేటర్' (మానవ సూచిక) అని పిలుచుకుంటున్నారు.

పాటిల్ ప్రతిరోజూ ఉదయం 9:30 నుంచి 11:30 గంటల వరకు అత్యంత రద్దీగా ఉండే సమయంలో ఈ సేవలను అందిస్తున్నారు. విరార్ ఫాస్ట్, బోరివలీ స్లో లేదా కల్యాణ్, పన్వేల్ వైపు వెళ్లే రైళ్ల గురించి ప్రయాణికులు అడిగే సందేహాలకు ఆయన ఎంతో ఓపికగా సమాధానాలు చెబుతారు. ప్రయాణికులు ఏ భాషలో ప్రశ్నిస్తే అదే భాషలో బదులివ్వడం ఆయనలోని ప్రత్యేకత. ఎలాంటి ప్రతిఫలం ఆశించకుండా ఈ సేవను పూర్తి చేసిన అనంతరం, ఆయన తన వృత్తిపరమైన విధులకు హాజరవుతారు.

ఇటీవల 'ట్రైన్స్ ఇండియా' అనే ఇన్‌స్టాగ్రామ్ ఖాతాలో పాటిల్ సేవలకు సంబంధించిన వీడియో పోస్ట్ చేయడంతో అది సామాజిక మాధ్యమాల్లో వైరల్‌గా మారింది. దీంతో ఆయన చేస్తున్న గొప్ప కార్యం వెలుగులోకి వచ్చి, నెటిజన్ల నుండి ప్రశంసల వెల్లువెత్తుతున్నాయి. పలువురు ఆయన్ను 'సైలెంట్ హీరో'గా అభివర్ణిస్తున్నారు. గతంలో తనకు కూడా పాటిల్ సరైన ప్లాట్‌ఫామ్‌, టికెట్ ధర వంటి వివరాలు తెలిపి సహాయం చేశారని ఒక యూజర్ తన అనుభవాన్ని గుర్తుచేసుకున్నారు. రైల్వే స్టేషన్‌లో సరైన సూచికలు, సైన్ బోర్డులు లేక ప్రయాణికులు పడుతున్న ఇబ్బందులను గమనించిన పాటిల్, ఏళ్ల క్రితమే ఈ సేవకు శ్రీకారం చుట్టారు.