"దైవశక్తి ఆగమన తేదీ ఖరారైంది".. సుమంత్ 'మహేంద్రగిరి వారాహి' రిలీజ్ డేట్ ఫిక్స్

విభిన్నమైన కథలను ఎంచుకుంటూ తనకంటూ ప్రత్యేక గుర్తింపు తెచ్చుకున్న నటుడు సుమంత్, తాజాగా నటిస్తున్న ఆసక్తికర చిత్రం ‘మహేంద్రగిరి వారాహి’. ‘సుబ్రహ్మణ్యపురం’ వంటి థ్రిల్లర్‌తో ప్రశంసలు అందుకున్న సంతోష్ జాగర్లపూడి ఈ చిత్రానికి దర్శకత్వం వహిస్తున్నారు. తాజాగా ఈ సినిమా విడుదల తేదీని చిత్రబృందం అధికారికంగా ప్రకటించింది. 2026, సెప్టెంబర్ 11న ఈ చిత్రాన్ని ప్రపంచవ్యాప్తంగా థియేటర్లలో విడుదల చేయనున్నట్లు ఒక ప్రత్యేక పోస్టర్‌తో వెల్లడించింది.

"దైవశక్తి ఆగమన తేదీ ఖరారైంది" (The Arrival Date of the Divine Force Is Locked) అనే ఆసక్తికరమైన క్యాప్షన్‌తో విడుదల చేసిన ఈ పోస్టర్ సినిమాపై క్యూరియాసిటీని పెంచుతోంది. ఇందులో సుమంత్‌కు జోడీగా మీనాక్షి గోస్వామి నటిస్తుండగా, ఐశ్యర్య రాజేశ్ ఓ ముఖ్య పాత్రలో కనిపించనున్నారు. వెన్నెల కిశోర్, రాజీవ్ కనకాల, శుభలేఖ సుధాకర్ తదితరులు కీలక పాత్రలు పోషిస్తున్నారు.

రాజశ్యామల ఎంటర్‌టైన్‌మెంట్స్ పతాకంపై మధు కలిపు, ఎం.సుబ్బారెడ్డి ఈ చిత్రాన్ని నిర్మిస్తున్నారు. విలక్షణమైన కథాంశంతో, థ్రిల్లింగ్ ఎలిమెంట్స్‌తో ఈ సినిమాను తీర్చిదిద్దుతున్నట్లు తెలుస్తోంది. ఈ చిత్రానికి ప్రముఖ సంగీత దర్శకుడు అనూప్ రూబెన్స్ స్వరాలు సమకూరుస్తుండగా, ఆర్.కె.ప్రతాప్ సినిమాటోగ్రాఫర్‌గా వ్యవహరిస్తున్నారు. ఎన్.ఎన్. మురళీధర్ కథ అందించిన ఈ సినిమాకు సంతోష్ జాగర్లపూడి తనదైన శైలిలో స్క్రీన్‌ప్లే, దర్శకత్వం అందిస్తున్నారు. ప్రస్తుతం ఈ సినిమాకు సంబంధించిన మరిన్ని వివరాల కోసం ప్రేక్షకులు ఆసక్తిగా ఎదురుచూస్తున్నారు.