పాట పాడిన సూర్య.. ‘విశ్వనాథ్ & సన్స్’ నుంచి 'ది వెడ్డింగ్ సాంగ్' విడుదల

విలక్షణ నటుడు సూర్య కథానాయకుడిగా, ప్రముఖ దర్శకుడు వెంకీ అట్లూరి దర్శకత్వంలో రూపొందుతున్న యాక్షన్ ఫ్యామిలీ ఎంటర్‌టైనర్ ‘విశ్వనాథ్ & సన్స్’. అభిమానులు ఎంతో ఆసక్తిగా ఎదురుచూస్తున్న ఈ చిత్రం నుంచి మేకర్స్ తాజాగా తొలి పాటను విడుదల చేశారు. ‘ది వెడ్డింగ్ సాంగ్’ పేరుతో శనివారం విడుదలైన ఈ పాటకు జాతీయ అవార్డు గ్రహీత జీవీ ప్రకాష్ కుమార్ సంగీతం అందించగా, కెన్ కరుణాస్ సాహిత్యం సమకూర్చారు.

ఈ పాటలోని ప్రధాన ఆకర్షణ ఏమిటంటే, హీరో సూర్య స్వయంగా దీనికి గాత్రాన్ని అందించడం. ఒక ఉమ్మడి కుటుంబంలో జరిగే వివాహ వేడుక నేపథ్యంలో చిత్రీకరించిన ఈ గీతంలో సూర్య, కథానాయిక మమితా బైజు తమ డ్యాన్స్‌తో సందడి చేశారు. హై-ఎనర్జీ ఫెస్టివ్ ట్రాక్‌గా రూపొందిన ఈ పాట సంగీత ప్రియులను విశేషంగా ఆకట్టుకుంటోంది. కాగా, ఈ పాటను సూర్య స్టూడియోలో రికార్డ్ చేస్తున్న ఫొటోలను గతంలోనే జీవీ ప్రకాష్ కుమార్ సోషల్ మీడియా వేదికగా పంచుకున్న విషయం తెలిసిందే.

‘విశ్వనాథ్ & సన్స్’ చిత్రాన్ని సూర్యదేవర నాగవంశీ, సాయి సౌజన్య నిర్మిస్తున్నారు. ఈ సినిమాను ఆగస్టు 14న ప్రపంచవ్యాప్తంగా విడుదల చేసేందుకు చిత్ర బృందం సన్నాహాలు చేస్తోంది. ఈ చిత్రంలో 40 ఏళ్ల అంతర్జాతీయ పిస్టల్ షూటర్ 'సంజయ్ విశ్వనాథ్' పాత్రలో సూర్య కనిపించనున్నారు. పెరుగుతున్న వయసుతో సంబంధం లేకుండా తన లక్ష్యం కోసం పోరాడే ఒక వ్యక్తి కథాంశంతో సాగే ఈ పాత్ర ఎంతో భావోద్వేగభరితంగా ఉండనుంది. సూర్య సరసన మమితా బైజు కథానాయికగా నటిస్తుండగా, రాధికా శరత్‌కుమార్, రవీనా టాండన్ ఇతర కీలక పాత్రల్లో నటిస్తున్నారు. ఈ చిత్రానికి నిమిష్ రవి సినిమాటోగ్రఫీ అందిస్తుండగా, నవీన్ నూలి ఎడిటర్‌గా వ్యవహరిస్తున్నారు.